Espoza Prezidente Repúblika, Cidália Nobre Guterres.

DILI, 31 marsu 2020 (TATOLI)–Espoza Prezidente Repúblika, Cidália Lopez Nobre Mouzinho Guterres, hanesan mós Inan ba nasaun, apela ba timoroan tomak liuliu ba inan feton sira atu proteje sira-nia an no sira-nia família hosi Corona Virus Deseases 2019 (COVID-19).

Iha mensájen audiovizuál ne’ebé Inan nasaun ne’e hato’o horisehik, Cidália Guterres fó énfaze hikas ba mensájen xave sira ne’ebé Ministériu Saúde (MdS) no Organizasaun Saúde Mundiál (OMS) hato’o ona, hanesan tuir mai ne’e :

“Hakmatek iha uma no minimiza movimentu ne’ebé la nesesáriu, mantein distánsia fíziku mínimu metru ida, labele halibur malu iha grupu, fase liman beibeik ho sabaun, labele kaer ita-nia matan, ibun ka inus bainhira seidauk fase liman, konsumu hahan ne’ebé nutritivu no bainhira iha síntoma COVID-19 hanesan mear, kokorok laran manas, isin manas, fanin no dada is araska, liga ba 119 ka aprosima-an ba sentru saúde ne’ebé besik,” inan ba nasaun ne’e apela.

Komunikadu ne’ebé TATOLI asesu husi média Gabinete Apoiu Atividade Cônjuge Prezidénsia Repúblika (GAAC-PR), hateten, Mensájen ho kontiudu kuaze hanesan Espoza Prezidente dedika espesífiku mós ba labarik sira.

Inan Nasaun ne’e, husu ba labarik sira atu hakmatek iha uma no estuda. Cidália haktuir katak bainhira ita bele prevene ita-nia an uluk husi transmisaun COVID-19, ita bele prevene ema seluk, ita-nia família no ita-nia nasaun.

Mensájen ne’e elabora ho serbisu hamutuk Gabinete Apoiu Atividade Konjuje (GAAC-sigla Portugéz), MdS, OMS no UNICEF. No asaun ne’e hola parte husi esforsu komunál ne’ebé entidade hotu-hotu halo hodi luta kontra COVID-19.

Cidália Guterres iha dada-lia ho ekipa husi MdS, OMS no UNICEF hato’o nia apresiasaun ba organizasaun sira ne’ebé halo esforsu estraordináriu hodi kombate COVID-19.

Parlamentu Nasionál iha loron 26 marsu 2020, vota ho unanimidade ba proposta Estadu Emerjénsia, no Prezidente Repúblika, Francisco Guterres Lú Olo, iha loron 27 marsu, dekreta katak hahú 28 Marsu 2020 oras 00:00 to’o 26 abril 2020 meia-noite, Timor-Leste tama iha estadu emerjénsia hodi fo dalan ba governu foti no implementa medida espesífiku sira hasoru COVID-19.

Notísia Relevante: PR Lú-Olo Dekreta Ona Estadu Emerjénsia Hodi Prevene COVID-19

Jornalista : Cipriano Colo

Editór      : Cancio Ximenes

HAKEREK NO HATÁN

Please enter your comment!
Please enter your name here