DNSA hadia pipa distribuisaun bee moos ne'ebé kotu. Imajen/DNSA

DILI, 31 marsu 2020 (TATOLI)–Diretór Diresaun Nasionál Servisu Água (DNSA), Eduardo Dias Ximenes hateten, maski iha estadu emerjénsia nia laran maibé DNSA prontu fornese bee ba komunidade sira ne’ebé iha problema ho sistema kanalizasaun at ka laasesu ba kanalizasaun bee husi DNSA nian.

“Bainhira ita-nia komunidade balu iha bairu mak problema ho sistema kanalizasaun husi DNSA nian, entaun ami husu para liga ba ami-nia ekipa task force ba estadu emerjénsia nian hodi bele rezolve kestaun refere,” dehan Diretór Diresaun Nasionál Servisu Água (DNSA), Eduardo Dias Ximenes, ba Ajénsia TATOLIliuhosi telephone, tersa ne’e.

Nia dehan, iha komunidade balu ne’ebé mak susar atu asesu bee ka kanalizasaun bee nian mak iha problema entaun liga direta ba xefe ekipa task force no xefe departamentu Abastesimentu Água Munisípiu Dili.

“Ho situasaun Estadu emerjénsia aproveita tempu ha’u husu ba mídia ajénsia TATOLI atu informa tutan informasaun kona ba bee -moos iha komunidade mak problema ka kanalizasaun bee mak la di’ak, bele liga ba ami xefe ekipa taks force, Francisco Afonso ho númeru telefone 78366465 no xefe departamentu Abastesimentu Água Munisípiu Dili, Francisco Xavier Pereira ho númeru telefone 77322607,” nia sujere.

Nia hateten, ema hotu-hotu tenke kumpri regra ne’ebé mak estadu fó sai katak hakmatek iha uma entaun ho ida ne’e parte DNSA labele la’o maibé númeru iha leten bele rezolve komunidade sira-nia preokupasaun.

Entretantu, Xefe Departamentu Abastesimentu Água Munisípiu Dili, Francisco Xavier Pereira hateten, sira-nia ekipa kontinua halo esforsu bainhira komunidade balu enfrenta krize ba bee.

“Ami prontu ajuda komunidade ne’ebé mak la asesu ba bee,” xefe departamentu Abastesimentu Água ne’e hateten.

Notísia Relevante: Movimentu Fatin Publiku Menus, DNSA Sei Muda Profil Ba Besik Komunidade

Jornalista : Osória Marques

Editór     : Cancio Ximenes

HAKEREK NO HATÁN

Please enter your comment!
Please enter your name here