Ekipa Gabinete Jestaun Krize. Imajen Tatoli/Egas Cristóvão

DILI, 30 marsu 2020 (TATOLI) – Gabinete Jestaun Krize ne’ebé estabelese ona no lidera husi Primeiru-Ministru, Taur Matan Ruak, hahú aban hala’o ona servisu ne’ebé atu fó apoiu ba Governu hodi kombate surtu COVID-19 iha rai-laran.

Diretór Institutu Defeza Nasionál (IDN), Donanciano Gomes ‘Pedro Klamar Fuik’, ne’ebé hola parte mós ba gabinete ne’e hateten, ekipa ne’e sei hahú servisu tékniku balun.

“Aban ami hahú ona servisu tékniku hodi bele haree oinsá maka bele masimiza ho di’ak liután koordenasaun ba esforsu hotu, ne’ebé maka ita-nia Estadu no nasaun iha atu kombate situasaun ida-ne’e”, nia dehan hafoin ramata enkotru ekipa Gabinete Jestaun Krize iha Sentru Konvensaun Dili (CCD, sigla portugés), segunda ne’e.

Notísia Relevante: Gabinete Jestaun Krize Aprezenta Métodu no Funsionamentu Luta Kontra COVID-19

Nia realsa, gabinete ne’e ninian funsaun maka halo koordenasuan ba rekursu nasionál liuliu liña interministeriál hotu atu fasilita Xefe Governu halo desizaun ida ba situasaun hasoru COVID-19.

“Hanesan ita hotu hatene katak ita iha Estadu Emerjénsia nia-laran, ne’ebé maka Prezidente Repúblika deklara ona. Tanba ne’e resentemente tuir orden husi Primeiru-Ministru tenke konstitui emediatamente Gabinete Jestaun Krize”, nia akresenta.

Tuir Pedro Klar Fuik, hahú aban ba oin ekipa sei komesa halo servisu kona-ba oinsá maka bele halo koordenasaun di’ak ba rekursu nasionál hotu ne’ebé maka liña ministériu, organizasaun nasionál no internasionál ne’ebé maka iha hakarak kontribui atubele kombate pandemia globál COVID-19.

Entertantu Gabinete Jestaun Krize ne’e Xefia Direita husi PM Taur no envolve ekipa interministeriál maka mai husi Ministra Saúde Interina, Élia António de Araujo dos Reis Amaral, Ministru Koordenadór Asuntu Ekonómiku interinu, Fidelis Manuel Leite Magalhães, Ministra Finansa interina, Sara Lobo Brites, Ministru Negósiu Estrajeiru no Kooperasaun, Deonísio da Costa Babo Soares, Ministru Administrasaun Estatál Interinu Abilio José Caetano.

Nune’e mós, Ministru Transporte Komunikasaun, José Agostinho da Silva, Ministru Defeza no Ministru Interior interinu, Filomeno do Paixão de Jesus, Ministru Justisa, Manuel Cárceres, Ministra Soslidaridade Sosiál no Inkluzaun, Armada Berta dos Santos, Ministra Edukasaun Juventude no Desportu, Dulce de Jesus Soares, Ministru Agrikultura no Peska, Joaquim José Gusmão dos Reis Martins.

No ikus liu maka, Ministru Ensinu Superiór,  Siensia no Kultura, Longuinhos dos Santos, Sekretáriu Estadu Komunikasaun Sosiál, Merício Juvinal dos Reis ‘Akara’, Sekretáriu Estadu ba Protesaun Sivíl, Alexandrino de Araujo, Xefe Estadu Maiór Jenerál Lere Anan Timur, Komadante Jerál Polísia Nasionál  Timor-Leste (PNTL), Faustino da Costa, no Diretór Sentru Integradu ba Jestaun Krize, Brigadeiru Jerál Aluk

Jornalista: Natalino Costa

Editora: Julia Chatarina

1 KOMENTÁRIU

  1. Parabens ekipa Gestaun kombate pandemia covid 19 no hein ktk bl halao servisu independente nune bele halakon virus at covid 19 iha Ita Rai doben Timor Leste, bom trabalho com susesu, hamutuk continua luta hasoru pandemia covid 19, abra¢os

HAKEREK NO HATÁN

Please enter your comment!
Please enter your name here