Baraka ne'ebé ekipa interministeriál prevensaun COVID-19, prepara iha Sentru Kuarentena Tibar. Imajen Tatoli/Cipriano Colo

DILI, 31 marsu 2020 (TATOLI)-Governu liuhosi ekipa inter-ministeriál prevensaun COVID-19 oras ne’e prepara tan kuarentena foun iha área Tasi-Tolu Dili.

Kuarentena foun ne’e atu apoiu governu hodi minimiza alokasaun orsamentu hodi selu otél sira ho presu karun.

Diretór Nasionál Aprovizionamentu Ministériu Saúde, Bernadino Armando da Silva, hateten ekipa monta ona tenda iha área uma adat Tasi-Tolu Dili hanesan alternativu hodi responde nesesidade bainhira Timoroan sira iha rai-li’úr kontinua fila mai Timor-Leste.

“Husi otél 13 ne’e, iha otél balun mak ninia presu ne’e aas demais, maibé ita-nia governu prepara ona Tasi-Tolu sai fatin Kuarentena ba Timoroan sira ne’ebé posiblidade sei desloka tan mai Timor-Leste,”katak nia ba TATOLI, iha Palasiu Sinzas, tersa (31/03/2020).

Nia identifika katak otél balun iha Dili, aproveita hodi hasa’e presu kuartu durante estadu emerjénsia.

“Se kuandu Tasi-Tolu preparadu ona ita sei hapara kontratu depois halo tiha pagamentu ba otél presu aas iha loron 14 ne’e,”. tenik tan.

Dadaun  ne’e governu estabelese ona fatin kuarentena hamutuk 17 ba ema  hodi  hela durante loron 14 hafoin fila hosi nasaun afetadu COVID-19 para prevene infesaun coronavirus iha Timor-Leste.

Jornalista : Tomé Amado

Editór       : Agapito dos Santos

HAKEREK NO HATÁN

Please enter your comment!
Please enter your name here