Sekretáriu Estadu Formasaun Profisionál no Empregu, Julião da Silva. Imajen Tatoli/Egas Cristovão.

DILI, 31 marsu 2020 (TATOLI) – Governu hahú diskute subsídiu ba trabaladór sira iha rai-laran, rai-li’ur inklui empreza sira durante períodu Estadu Emerjénsia.

“Ami diskute atu Governu bele fó subsídiu ba sira (trabaladór rai-laran no rai-li’ur inklui empreza sira), atu labele fó implikasaun ba emprezáriu sira tanba ema sosa laiha no rendimentu tun, maibé taxa ba sira ne’e aas hela de’it ne’e susar tanba ema bele taka empreza. Kuandu taka númeru dezempregu sa’e aas”, tenik Sekretáriu Estadu ba Formasaun Profisionál no Empregu, Julião da Silva, hafoin enkontru iha Salaun Sosiedade Sivíl iha Palásiu Governu, tersa ne’e.

Ho nune’e, nia dehan antes ne’e Ministériu Koordenadór Asuntu Ekonómiku (MKAE) hamutuk ho liña ministeriál hahú diskute asuntu ida-ne’e.

“Oinsá atu fó solusaun di’ak ba empregadór no trabaladór durante períodu Estadu Emerjénsia. Tanba COVID-19 ne’e afeta ba ekonomia Timor-Leste, nune’e oinsá buka maneira atu asegura ekonomia país ne’e”, nia akresenta.

Governu sei kontinua reuniaun hodi aprezenta proposta ba Primeiru-Ministru, Taur Matan Ruak hodi aprezenta ba Konsellu Ministru atubele halo apresiasaun.

“Ami sei diskute ida-ne’e ho MKAE atu fó solusaun iha períodu Estadu Emerjénsia iha fulan-abríl de’it, maibé ita-nia estimasaun ne’e ba fulan tolu ka neen ida hanesan ne’e tanba moras ne’e dinámika”, nia adianta.

Sekrétariu Estadu ne’e refere liután kona-ba subsídiu ne’e Governu hanoin hela atu fó ba trabaladór iha Timor-Leste, iha Austrália no Koreia Súl inklui empreza sira.

“Iha Austrália no Koreia Súl halo lockdown ona, entaun ita-nia trabaladór sira nia kustu vida ne’e sa’e no rendimentu menus, ne’ebé atu haree fó subsídiu ba sira ka ita atu deporta sira fila hotu ka sira kontinua servisu. Maibé Governu haruka subsídiu ba sira atu fasilita sira-nia alimentár”, nia salienta.

Ho nune’e, nia informa tan katak sei buka hela solusaun no sei diskute hela ka kestaun ne’e.

“Espera katak iha semana-oin ita bele iha solusaun husi Ministériu koordenadór Asuntu Ekonomia atubele aprezenta ba Konsellu Ministru”, nia dehan tan.

Governante ne’e subliña, Governu iha hanoin no halo estimasaun katak subsídiu ba trabaladór iha Austrália no Korea Súl ne’e ho kustu barak ne’ebé iha hanoin mós atu deporta sira ne’ebé kustu kiik hodi akompaña situasaun COVID-19 mak bele ba servisu fali.

“Ita nia Estadu Emerjénsia ne’e la’ós signifika taka atividade ekonomia hotu, maibé loja sira ne’ebé fa’an nesesidade báziku kontinua loke. Ami hanoin mós atu hamosu Dekretu Governu ida tan atu haree empreza sira ne’ebé fa’an nesesidade báziku labele taka”, nia afirma.

Entidade ne’ebé maka envolve iha diskusaun ne’e maka Ministru Reforma Lejizlativa no Asuntu Parlamentár no Ministru Koordenadór Asuntu Ekonómiku interinu, Fidelis Manuel Leite Magalhães, Ministra Solidariedade Sosiál no Inkluzaun, Armanda Berta dos Santos, Ministru Ensinu Superiór, Siénsia no Kultura, Longuinhos dos Santos, Ministru Obra Públika, Salvador Soares dos Reis Pires, Ministru Transporte no Komunikasaun, José Agustinho da Silva, Ministra Finansa interina, Sara Lobo Brites, Sekretáriu Estadu ba Formasaun Profisionál no Empregu, Julião da Silva, hamutuk ho Governadór Banku Sentral, Abrão Vasconcelos.

Jornalista: Florencio Miranda Ximenes
Editora: Julia Chatarina

HAKEREK NO HATÁN

Please enter your comment!
Please enter your name here