Pasajeiru Aviaun Citilink bainhira to’o iha Aeroportu Prezidente Nicolau Lobato, Comoro, Dili. Imajen Tatoli/António Gonçalves

DILI, 31 marsu  2020 (TATOLI) – Tama ona iha loron dahaat Prezidente Repúblika dekreta Estadu Emerjénsia relasiona ho COVID-19 no Governu hahú implementa ninia medida prevensaun ba moras ne’e, inklui fó limitasaun ba transporte Aéreu, Marrítima no Terestre.

Ministru Transporte no Komunikasaun, José Agostinho da Silva, informa durante Estadu Emerjénsia, Governu aseita hodi autoriza operasaun Aéreu kontinua la’o nafatin maski fó limitasaun, tanba sidadaun Timor-Leste iha estranjeiru, balun hakarak fila  no Governu laiha razasaun atu impede sira ninia movimentu iha situasaun ne’e.

Nia realsa, ho situasaun Estadu Emerjénsia ida-ne’e, Ministériu Transporte no Komunikasaun (MTk) hafoin halo analiza no tetu konteksu husi Governu nia maka agora tama ba faze implementasaun dahuluk no agora kona-ba movimentu transporte aéreu ne’ebé durante ne’e aviaun sira opera ho dirasaun Dili-Kupang, Dili-Bali, Dili-Singapura no Dil-Darwin.

“Hafoin Ministériu Transporte no Komunikasaun  tetu razaun sira-ne’e hotu no hatún desizaun katak ita halo limitasaun movimentu. Agora Governu deside kada semana ida voo dala-ida de’it, ne’e vigora ba aviaun hotu hanesan Citilink, Transnusa, Sriwijaya, Royal Bhutan no Airnorth. Objetivu maka oinsá bele fasilita ita-nia sidadaun sira husi estrajeiru bele tama Timór”, dehan Ministru Jose Agostinho iha Palásiu Governu, tersa ne’e.

Governante ne’e konsidera, timor-oan sira iha rai-li’ur nia meiu transporte maka aéreu tanba ne’e Governu labele suspende, maibé limite de’it voo no autoriza kada semana dala-ida.

“Nune’e bele fasilita ita-nia populasaun sira hanesan estudante iha Indonézia ka traballadór sira husi Korea Súl, Irlándia, Austrália no fatin seluk atu fila mai Timór”, nia akresenta.

Nia dehan tan, ba kestaun ne’e Governu tenke halo monitorizasaun ba ema-sira husi rai-li’ur ho rigór hanesan husi parte saúde tenke haree didi’ak no labele falla iha kontrolu.

“Sira ne’ebé maka mai ne’e tenke kontrolu ho di’ak, tanba ne’e tenke ba karantina. Objetivu maka atu trava moras id-ne’e labele hada’et nia sirkulasaun ba ema seluk no atu prevene maka ninia kotrolu tenke rigorozu”, nia dehan tan.

Tuir Ministru José Agostinho karik ba futuru  moras ne’e kontinua la’o maka Governu sei tetu situasaun gravidade husi moras ne’e no sei hatúr desizaun kolletiva.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here