Ró Berlin Nakroma atraka iha terminál ró iha Portu Dili. Imajen/Florencio Miranda Ximenes

DILI, 31 marsu 2020 (TATOLI) – Ministru Transporte no Komunikasaun, José Agostinho da Silva hasoru malu ho Primeiru-Ministru (PM), Taur Matan Ruak, hodi ko’alia kona-ba meiu transporte marítima, aéreu no terrestre, ne’ebé sei ativu durante Estadu Emerjénsia maski iha limitasaun balun.

“Ohin iha ha’u-nia audiénsia, ko’alia ho Primeiru-Ministru oinsá maka ita bele asegura nafatin ita-nia konektividade via marítima ba populasaun sira ne’ebé atu bá eklave Oé-cusse no Atauro”, nia informa hafoin hasoru malu ho Xefe Governu iha Palásiu Governu, tersa ne’e.

Governante ne’e realsa, ba transporte marítima sei limita viajen ne’ebé antes ne’e kada semana ida, halo viajen dala-rua ba Oé-cusse no Atauro maibé agora semana ida dala-ida de’it.

“Oráriu bá Ró Berlin Nakroma maka sei halo viajen iha loron kinta, semana ida dala-ida, enkuantu Ró Sukses halo nia viajen iha loron domingu semana ida dala-ida. Ne’ebé sira na’in-rua halai troka-malu atu asegura nafatin nesesidade báziku populasaun nian. Ró rua ne’e ho presu normál, labele aproveita situasaun ne’e atu fó fali presu aas ba sidadaun sira”, Ministru José Agostinho akresenta.

Notísia Relevante: Governu Deside Suspende Provizóriu Movimentu Aéreu, Marítima no Terrestre

Biban ne’e, nia husu ba entidade sira hotu, liuliu ba Ministériu Saúde tenke tau-matan ba sidadaun sira husi Oé-cusse atu prevene moras COVID-19, tanba haree ba enklave ne’e iha fronteira direita ho Indonézia no iha pontu entrada rua ne’ebé iha risku atu ema tama liu dalan ilegál.

“Entaun ita antesipa ida-ne’e, keta halo sira liu via trasporte marítima. Ha’u hanoin fó risku ba ita tanba ita-nia foku agora ne’e oinsá atu evita ka trava ema-nia sikulasaun hodi prevene moras ne’e labele da’et husi ema ba ema”, nia dehan tan.

Kona-ba pasajeiru husi Atauro, Ministru adianta, pasajeiru sira ne’e iha ligasaun ho peskadór sira iha illa Diran, Indonézia.

“Sira bele uza Ró Nakroma no Sukses, hodi labele falla husi ita-nia kontrolu saúde públika no asegura nafatin viajen ró-ahi, maibé tenke kumpre regra saúde ne’ebé maka hatúr ona”, nia salienta.

Ministru refere kona-ba trasporte terrestre nian, movimentu transporte públiku hanesan taxi no mikrolet la halai hanesan bain-bain, maibé ba travel sei halo operasaun.

“Hanesan dehan ona katak timor-oan ne’ebé mai husi nasaun li’ur ho situasaun agora, sira servisu iha li’ur maibé laiha ona oprtunidade servisu, tanba ne’e tenke fila, labele hela iha ema-nia rai tanba situasaun la permite. Kuandu sira mai tenke tama karantina tuir regra ne’ebé Ministériu Saúde estabelese ona, nune’e bele prevene-an husi moras COVID-19 tanba ne’e risku ba ema nia vida”, nia subliña.

Nia rekoñese, deklarasaun ne’ebé antes ne’e halo hanesan deklarasaun verbál de’it tanba seidauk iha dokumentu komprovativu ruma ne’ebé maka orienta atu suspende konetividade aéreu, marrítima no terrestre.

“Ita-nia timor-oan sira ne’ebé maka mai ne’e, ita labele suspende maibé ita bele suspende de’it ba ema estrajeiru”,nia akresenta.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here