Mediku sira rega hela aimoruk ba Estudante sira husi jawa,Indonesia wainhira to iha aeroportu Nicolao Lobato ,Dili 29 Marsu 2020.Imajen/Antonio Goncalves

DILI, 31 marsu 2020 (TATOLI)-Doutora Cardelita Batista Maia de Jesus Araujo, informa resultadu observasaun hosi ekipa médika ba Estudante Timoroan 32  ne’ebé dadaun ne’e kuarentena iha Otél Viana Hudi-Laran Dili, seidauk deteta mosu sintoma pandemia globál COVID-19.

Ekipa Médiku Ministériu Saúde nian halo ona observasaun ba abitante 32, mane ema na’in  22 no feto  10 komesa iha loron domingo (29/03/2020) hafoin fila hosi Indonézia ho Aviaun Sriwijaya  hodi hela iha fatin kuarentena refere.

“Ita-nia alin sira ne’e sei mantein ho kondisaun saúde ne’ebé normál, signifika seidauk iha sintoma ruma mak indika ba COVID-19 nian,”informa Doutora destakadu, Cardelita Batista Maia de Jesus Araújo, ba TATOLI, iha Otél Viana Hudi-Laran, tersa (31/03/2020).

Hodi hatutan tan, nia ho ekipa médiku sira seluk mós destaka iha fatin ne’ebá atu atende no fó tratamentu saúde ba Timoroan hirak ne’e durante loron 14.

“Ha’u mós kuarentena hotu ne’ebé ita akompaña sira maibé avaliasaun ita halo dala ida kada loron,”tenik tan.

Nia dehan obrigasaun médiku sira-nian maka sempre fó atensaun ba okupante sira atu kumpre regulamentu Ministériu Saúde (MS) ho Organizasaun Mundiál Saúde (OMS) hanesan evita tuur hamutuk, labele sai hosi kuartu, tenke informa lalais ba médiku sira bainhira mosu sintoma isin manas, me’ár no seluk tan.

“Agora kona-ba problema moras hanesan estomágu ka isin manas bain-bain iha ekipamentu báziku atu bele atende sira,”nia hatutan.

Jornalista : Tomé Amado

Editór       : Agapito dos Santos

HAKEREK NO HATÁN

Please enter your comment!
Please enter your name here