Jornalista Agência Tatoli, Natalino Costa, dadalia ho Negosiante Merkadu Taibessi, Julião Baptista Fernando. Imajen Tatoli/Egas Cristovão

DILI, 31 marsu 2020 (TATOLI) – Negosiante Merkadu Taibessi, Julião Batista Fernando, hateten ligadu ba situasaun Estadu Emerjénsia ne’ebé daudaun ne’e, fó empaktu tebes ba negosiante sira iha Merkadu Taibessi tanba rendimetu kada loron tun la hanesan tempu bain-bain.

“Ha’u hakarak dehan nu’udar negosiante triste ho kestaun Coronavírus, hafoin Dekreta Estadu Emerjénsia no ami sente triste boot tanba nu’udar negosiante afeta tebes ba ami-nia rendimentu”, nia dehan ba Agência Tatoli iha Merkadu Taibesi, tersa ne’e.

Nia kompara, rendimentu tinan kotuk bainhira situasaun sei normál seidauk iha Coronavírus no Estadu Emerjénsia sira hetan rendimentu di’ak.

Ai-han iha Mercado Taibessi. Imajen Tatoli/Egas Cristovão

“Ha’u kompara de’it rendimentu ne’ebé ami hetan iha tinan kotuk, as vezes loron ida ami hetan $70 no dalaruma bele to’o $100, maibé agora loron ida mós laiha ka dalaruma ami bele hetan de’it $10 ka $20, tanba ema la mai. Dalaruma modo sira ne’e dodok estraga de’it”, Julião adianta.

Durante ne’e, Juliaõ fa’an ai-manas, modo tahan, no ai-fuan sira hanesan ai-ata no ai-fuan seluk tan.

Nia dehan tan, nu’udar negosiante nia sente triste maibé buat hotu tanba kondisaun, tanba ne’e tenke pasiénsia hodi la’o tuir kondisaun no situasaun sira  ne’ebé la’o daudaun.

Iha  fatin hanesan, negosiante Anita de Araújo hateten nia parte mós sente triste tanba modo sira ne’ebé maka nia fa’an ladún folin iha fulan ida-ne’e.

“Ha’u triste tanba fulan ida-ne’e rendimentu ne’ebé maka ami hetan tun, kompara tinan kotuk no fulan rua-rua liubá ne’e ami loron ida bele hetan $15 to’o $20. Sorte ami bele hetan liu maibé agora dalaruma ami hetan de’it loron ida $5, sé laiha liu ami triste tanba ema la hola modo to’o dodok deit”, nia akresenta.

Nia haktuir, fulan ida ne’e nia laran ema ladún mai hola sasén no movimentu iha Merkadu Taibessi laran mós ema menus tebes.

Iha sorin seluk, Negosiante Nuu, Adelino Maio iha Largo Lecidera sente triste tanba nia redimentu menus tebes.

“Ha’u sente triste ba situasaun ida agora, tanba moras Coronavírus halo Estadu tenke fó sai Estadu Emerjénsia no agora ema iha uma de’it no la la’o ba mai. Fatin largu ida uluk ema barak mós agora hakmatek los, dalaruma loron ida la heten liu hanesan uluk ne’ebé ami hetan loron ida bele to’o $40 to’o $50, agora lae kedas”, nia salienta.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here