Logotipu AJAR

DILI, 31 marsu 2020 (TATOLI)-Organizasaun la’ós governu nian (ONG) Asia Justice and Rights (AJAR) husu ba guardiaun exekutór estadu emerjénsia hosi Polísia Nasionál Timor-Leste  (PNTL) ho FALINTIL-Forsa Defeza Timor-Leste (F-FDTL) atu kumpre regra estadu emerjénsia hodi la viola direitu báziku no direitu moris povu nian.

Notísia Relevante : PDHJ: Estadu Emerjénsia Labele Viola Direitu Moris

Koordenadór AJAR, Inocêncio Xavier. Imajen/Osória Marques

Koordenadór AJAR, Inocêncio Xavier,  apresia ho esforsu estadu nian liuhosi Prezidente Repúblika dekreta estadu emerjénsia, oinsá atu halo prevensaun ba pandemia peste letál Coronavirus ka COVIC-19 iha Timor-Leste.

“Implementasaun estadu emerjénsia iha direitu sidadaun sira-nian balun tenke limita, maibé direitu hanesan dignidade pesoa umana, labele viola,” afirma Inocêncio Xavier, hodi responde Ajénsia Tatoli, ohin, via telefónika.

“Ida ne’e parte ida di’ak, oinsá mak prevene pandemia Coronavirus ne’e da’et ba Timoroan iha Timor-Leste,” Inocêncio Xavier hateten.

Nia husu  ba komunidade atu kontribui hodi halo limitasaun kontaktu sosiál no halo tuir maneira-sira hosi Ministériu Saúde no Organizasaun Mundiál Saúde (OMS) hodi prevene COVID-19.

Tuir observasaun AJAR nian iha ámbitu  implementasaun estadu emerjénsia sei la’o tuir hela ba norma legais estadu emerjénsia nian.

 “Ami ninia rede advokasia iha territóriu laran nafatin akompaña periodu estadu emerjénsia no husu ba komunidade hotu karik sai vítima ba kazu violasaun direitu umanu bele hato’o keixa ba AJAR,” tenik Inocêncio Xavier.

Jornalista : Nelson de Sousa

Editór       : Francisco Simões

 

HAKEREK NO HATÁN

Please enter your comment!
Please enter your name here