Atividade iha Reinu Unidu paradu hotu tanba Governu deside lockdown hodi prevene Coronavirus ka COVID-19. Imajen/foti hosi Google

DILI, 31 marsu 2020 (TATOLI) –Timoroan rihun ne’ebé buka vida nu’udar traballadór iha Reinu Unidu (United Kingdom) ho Irlanda preokupadu boot no sente “ameasadu” lakon serbisu tanba efeitu hosi pandemia Coronavirus ka COVID-19 ne’ebé da’et makaas no lalais tebes hosi ema ba ema iha Reinu Unidu ho Irlanda.

Ho propagasaun COVID-19 ne’e,  segunda (23/03/2020), oras Reinu Unidu nian, Primeiru-Ministru Reinu Unidu, Boris Johnson, deside taka provizóriu (lockdown) atividade hotu iha Reinu Unidu durante semana rua nia-laran. Populasaun hotu labele sai hosi uma (stay home), anaunsér,   sai bá kompra nesesidade bázika.

Ho desizaun ne’e, restaurante lubun, inklui fabrika-sira ne’ebé absorve maioria timoroan  serbisu, deside taka no traballadór-sira haruka iha uma de’it.

Pedro João, António José Pinto Filipe, Napoleão da Silva ho Atanásio Jacob Piedade, nu’udar traballadór timoroan iha sidade Manchester,  Reinu Unidu,    haktuir ba Ajénsia Tatoli, ohin, via mensajen Facebook, katak, maioria hosi traballadór  timoroan ne’ebé namkari iha Reinu Unidu, inklui Irlanda, sente preokupa no pániku ho pandemia COVID-19 ne’ebé fó ameasa ba sira-nia vida.

“Ameasa seluk ne’ebé halo ami  preokupa mós mak ami la servisu ona, tanba fatin-sira ne’ebé ami servisu ba taka hotu ona,” hateten traballadór timoroan hirak-ne’e.

Sira lia-tun tan, “ami ho maluk-sira ne’ebé serbisu iha fábrika ne’e hetan netik pensaun semana tolu nian tuir ami-nia saláriu báziku durante tempu lockdown. Agora, belun-sira ne’ebé serbisu iha restaurante ne’e para automátika no la hetan pensaun ruma. Situasaun ida-ne’e, afeta tebes ba ami-nia kondisaun moris, liuliu laiha osan atu selu hela fatin, eletrisidade no selu taxa sira seluk-tan hodi kumprimenta ba lei mak vigor iha Reinu Unidu.”

José Antonio Filipe ho Atanásio Jacob Piedade, nu’udar traballadór iha restaurante balun iha sidade Manchester, hateten, maioria timoroan servisu iha restaurante la servisu ona tanba restaurante taka.

“Situasaun ida-ne’e mak kontinua to’o fulan ida nia-laran, ami hotu sei terus tanba laiha ona kbiit atu sustenta-aan. Atu fila bá Timor ladi’ak tanba atividade transporte aéreu, terrestre no marítima taka hotu ona (lockdown),” traballadór-sira nee haktuir.

Esperansa boot hosi traballadór timoroan-sira iha Reinu Unidu mak oinsá Estadu no Governu Timor-Leste liuhosi Embaixada Timor-Leste nian iha sidade Londres, Reinu Unidu, atubele buka meiu ka polítika diplomasia, oinsá mak bele tulun sira enfrenta situasaun emerjénsia ida-ne’e.

“Nu’udar timoroan, ami-nia esperansa boot ba ita-nia Estadu no ita-nia Governu  através Embaixada Timor-Leste nian iha Londres, bele tulun ami no buka dalan ba solusiona situasaun-sira ne’ebé ami enfrenta. Atu nune’e, timoroan-sira hotu iha Reinu Unidu labele sente mesak no abandonadu,” sira hateten.

Informasaun ikus ne’ebé públika hosi mídia-sira iha Reinu Unidu katak, totál kazu COVID-19 loron ba loron aumenta to’o  ne’ebé afeta ona ba ema  na’in 3.000.

Total kazu ne’ebé hetan sintoma sa’e ona ba 14.543 ne’ebé vítima ne’ebé lakon vida (mate) 181.

Informasaun ne’ebé fó-sai hosi Ministériu Saúde Reinu Unidu nian katak, ema mate iha Reinu Unidu tanba COVID-19 aumenta ona ba 759.

Governu Enkoraja Mantein Kalma no Labele Pániku

Ministru Negósiu Estranjeiru no Kooperasaun, Dionísio da Costa Babo Soares. Imajen/Egas Cristóvão

Hosi sorin seluk, Ministru Negósiu Estranjeiru no Kooperasaun (MNEK), Dionísio  da Costa Babo Soares, lori Governu Timor-Leste nia naran enkoraja ba Timoroan hotu iha rai estranjeiru, ne’ebé hala’o vida hanesan traballadór, estudante no diplomata,  atu mantein kalma no labele pániku tanba peste letál COVID-19 ne’e la koñese fronteira no da’et ba rai hotu.

“Agora governu konsentra hela ba prevensaun COVID-19 iha rai-laran no ita mobiliza rekursu hotu hodi buka meius prevensaun no mós prepara karik pandemia ne’e da’et mai ita-rain,” hateten Ministru  Dionísio da Costa Babo Soares, hodi responde Ajénsia Tatoli liuhosi mensajen WhatsApp.

Ministru Dionísio da Costa Babo Soares haklaken tan katak, iha estranjeiru, iha meius barak ne’ebé governu subsidia no sistema saúde ne’ebé di’ak-liu tanba meius tratamentu avansadu-liu.

“Ita konfia katak, sistema saúde iha estranjeiru bele trata Timoroan-sira di’ak liu-tan,” hateten Dionísio Babo.

Nia akresenta tan, Timoroan balun iha estranjeiru no Governu husu atu hakbesik ba sistema saúde ne’ebé besik hodi hetan tratamentu di’ak no sira-ne’ebé serbisu no hela-metin iha estranjeiru, mantein kalma no kumpre ba prosedura orientasaun Organizasaun Mundiál Saúde (OMS) kona-ba prevensaun pandemia COVID-19.

Sobre mobilizasaun rekursu finanseiru, Ministru Dionísio Babo Soares, hateten, rejime duodesimu limita tebes governu no esforsu ne’ebé halo konsentra ba de’it prevensaun no tratamentu COVID-19 iha rai-laran.

Esforsu ne’ebé halo mós, katak Dionísio Babo, hodi haree problema inundasaun ne’ebé ema-barak sai vítima to’o agora seidauk rezolve hotu.

“Problema moras dengue ne’ebé sa’e makaas, preparasaun ai-han ba fulan hirak ne’ebé mai no nesesidade bázika populasaun nian sai esforsu governu nian daudaun nee,” hateten Dionísio Babo.

Nia hatutan, poor-enkuantu governu la iha kbiit liu ida-ne’e hodi hanoin ba buat-seluk mo Ministériu Reforma Lejizlativa no Asuntu Parlamentár (MRLAP) ho Ministériu Koordenadór Asuntu Ekonomia (MCAE)   prepara hela pakote rekuperasaun ekonómika hodi bele akomoda situasaun rai-laran durante situasaun estadu emerjénsia.

Jornalista : Eugénio Pereira

Editór       : Francisco Simões

2 KOMENTÁRIU

  1. Iha nebe mak timor oan ameasado ba serviso fabrika barak simu hela atu servico só que timor oan barak mak lakhoi ba serviso iha fabrika tambah moras nebe iha uk nungka ameasado ida.

    • Situasaun ida agora dadaun, Estado presiza rona sidadaun hotu nia prekupasaun, ida senhor koloka ne’e questaun ne’ebe la-pertinente.

HAKEREK NO HATÁN

Please enter your comment!
Please enter your name here