Diretór Jerál Autoridade Aduaneira (AA), José António Fátima Abílio. Imajen/Egas Cristovão

DILI, 31 marsu 2020 (TATOLI) – Durante ne’e tuir Rezolusaun Governu nian katak transporte sira ne’ebé tula sasán merkadoria husi Indonézia liuhosi Fronteira Batugade, Munisípiu Bobonaro tenke para de’it iha zona livre ka zona internasionál.

Tanba ne’e, Diretór Jerál Autoridade Aduaneira (AA) ka Alfándega, José António Fátima Abílio, hateten empreza sira ne’ebé hatama sasán hosi Indonézia tenke prepara rasik transporte hodi nune’e bele tula sasán sira ne’e mai Dili.

“Kona-ba transporte atu tula sasán sira mai Dili ne’e kabe ba kompeténsia kompañia sira ne’ebé importa sasán. Alfándega halo apreensaun iha fronteira tanba tuir Rezolusaun Governu katak transporte hotu ne’ebé mak lori sasán mai iha zona internasionál ka zona livre tenke para hodi hatún tiha sasán, hafoin distributór hosi Timór lori nia kareta ba tula tama mai, tuir rezolusaun ne’ebé alfándega implementa”, hateten Diretór Jerál Alfándega, José António Fátima Abílio ba Agência Tatoli, iha ninia knaar fatin, Palásiu Governu, tersa ne’e.

Relasaun ho transporte, responsável ne’e esklarese katak laiha ligasaun ho servisu alfándega, atu negosia ba folin transporte entre kompaña, sé karik distributór laiha transporte atu tula sasán tama mai Timór maka tenke buka transporte hodi aluga.

“Sé aluga depende negosia ho na’in ba transporte, folin atu boot ka kiik parte rua maka persiza halo negosia”, nia akresenta.

Governu Presiza Estabelese Tabele Prezu Atu Transporta Sasán

Responde ba preokupasaun empreza sira nian, relasiona ho transporte sira tula sasán ho folin la normál, responsavél ne’e sujere katak Governu liuhosi Ministériu Transporte no Komunikasaun (MTK) presiza estabelese tabela hodi fasilita timoroan sira ne’ebé hakarak hatama sasán mai Timór no laiha transporte atu tula mai liu Dili, maka ho situasaun sira hanesan agora ema bele manobra presu.

“Tanba hanesan foin lalais iha loron 19 marsu liubá, bainhira tula forekeli mai, iha kompañia ida maka hatama mai, maibé tanba laiha transporte entaun husu atu aluga no kareta na’in fó presu $700. Ne’e defísil tebes”, nia relata.

Nia hatutan, bainhira sasán sira ne’e seidauk tula hodi lori bá fatin determinadu tanba kestaun transporte, entaun alfándega Timor-Leste komunika fali ba iha alfándega Atambua hodi informa kompañia sira ne’ebé mak lori sasán mai tenke kontakta uluk lai sira hosi parte Timór nian katak na’in atu ba simu ne’e iha kareta ka lae.

“Sé laiha lalika mai obriga-an hakarak tama no tenke para iha zona internasionál”, nia realsa.

Nia dehan tan, daudaun ne’e iha kareta ualu maka sei para iha zona livre no iha kareta neen maka mai ona Dili, enkuantu rua ba Munisípiu Bobonaru, Postu Administrativu Maliana.

“Kareta rua tula sasán ba Maliana ne’e, na’in ba sasán sira sobu ona hodi tula tanba nia iha de’it kareta kiik ida ne’ebé tula sasán oituan de’it husi Dili nian sei para iha ne’ebá tanba kareta laiha, maibé tanba sira selu tiha ona impostu no atu asegura liután entaun alfándega hosi Atambua mós autoriza katak bele para iha zona livre ne’e”, nia esplika.

Nia relata, bainhira situasaun la’o normál maka bele lori tama sasán sira ne’ebé iha kareta laran no labele sobu sai tanba sasán rahun barak.

“Empreza ne’ebé atu ba tula laiha transporte no atu aluga maibé presu aas, tanba ne’e obriga aluga maka sei iha impaktu ba merkadoria tanba sei hasa’e sasán ninia folin”, nia dehan tan.

Relasiona ho selu taxa, Dirijente ne’e konfirma katak pagamentu taxa ba Estadu rejista iha sistema, tanba ne’e defísil atu halo maninpulasaun ba presu.

Jornalista: Antónia Gusmão

Editora: Julia Chatarina

 

HAKEREK NO HATÁN

Please enter your comment!
Please enter your name here