Sekretariu Jeral MNEK, Jorge Trindade Camões. Imajen/TATOLI

DILI, 31 marsu 2020 (TATOLI)–Sekretáriu Jerál Ministériu Negósiu Estranjeiru no Kooperasaun (MNEK), Jorge Trindade Camões, informa Diplomata Timoroan ida iha nasaun balun iha Ázia ne’ebé pozitivu ba coronavirus ka COVID-19 ninia kondisaun hahú hatudu progresu pozitivu.

“Ha’u foin simu informasaun ida katak nia kondisaun di’ak uitoan ona. Ita labele preokupa. Fiar metin iha doutór sira tanba tau-matan hela.  Iha tempu badak nia bele rekupera ona,” katak Jorge Camões ba jornalista sira iha Sentru Konvensaun Dili (CCD-sigla portugés), tersa (31/03/2020).

Jornalista sira husu kona-ba identidade pesoál hosi diplomata ne’e,  Jorge Camões rejeita atu fó sai ba públiku tanba tenke kuidadu ema ninia privasidade.

Maibé, nia garante kondisaun saúde hosi diplomata ne’e di’ak no sei rekupera lalais iha tempu badak hodi halo filafali ninia servisu.

“Nia progresu pozitivu. Ha’u foin simu mensajen. Maski informasaun fó-sai ona fatin maibé ha’u sei labele temi nasaun nia naran. Ha’u hakarak asegura privasidade maluk ne’e nian no ha’u dehan de’it diplomata timoroan,” nia tenik.

Enkuantu, kona-ba Embaixadór Timor-Leste ba Xina ne’ebé deskonfia suspeitu ba COVID-19, nia relata médiku sira fó hela tratamentu saúde ba diplomata ne’e.

Jornalista : Hortencio Sanchez

Editór       : Agapito dos Santos

HAKEREK NO HATÁN

Please enter your comment!
Please enter your name here