Atividade iha Portu Dili. Imajen/Egas Cristovão

DILI, 31 marsu 2020 (TATOLI) – Maski Prezidente Repúblika (PR), Francisco Guterres ‘Lú Olo’ dekreta ona Estadu Emerjénsia hodi kombate pandemia globál COVID-19, enkuantu Governu mós fó sai ona medida prevensaun, maibé sei fó oportunidade ba transporte Aériu, Marítima no Terrestre sira halo movimentasaun tula sasán ne’ebé Governu presiza.

Diretór Jéral Autoridade Aduaneira (AA) ka Alfándega, José António Fátima Abílio, informa aban ró rua mai hosi Indonézia tula sasán merkadoria mai Timor-Leste.

“Loos duni katak relasiona ho COVID-19, iha Portu Dili kontentór tama menus tebes. Maibé aban maka foin ró rua mai husi Indonézia, durante ne’e ró sira mai mós komesa diminui tanba lockdown. Ne’e la’ós Timór de’it maibé iha fatin-fatin, signifika ema hotu halo prevensaun entaun automatikamente afeta ba movimentasaun merkadoria”, informa  Dirijente ne’e ba Agência Tatoli iha nia knaar fatin, Palásiu Governu, tersa ne’e.

Notísia Relevante: Movimentasaun iha Portu Dili La’o Normál

Maske movimentasaun merkadoria menus, maibé la taka dalan katak sira ne’ebé iha tiha ona kontratu ka prontu ona atu hatama sasán bele hala’o nafatin atividade.

“Ami simu ona informasaun katak ró rua ne’e sei mai tula nesesidade bázika”, Diretór adianta.

Alende ne’e, nia relata mós katak desde iha janeiru 2020, parte Alfándega seidauk halo apreensaun ba bebida sira hosi rai-liur.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here