Prezidente Republika,Imajen/Media PR

DILI, 30 marsu 2020 (TATOLI)–Prezidente Repúblika, Francisco Guterres “Lú Olo”, agradese apoiu sira ne’ebé hetan tiha ona no husu nasaun tolu hanesan Austrália, Kuba no Xina atu reforsa tan kooperasaun ba kombate Virus Corona.

Sentidu agradesimentu no pedidu ne’e, Prezidente Repúblika, Francisco Guterres “Lú Olo”, hato’o liuhosi komunikadu ne’ebé fó sai husi palásiu Prezidensiál Bairru Pité, Dili.

Iha komunikadu ne’e hateten, nasaun sira iha mundu ohin loron luta hasoru inimígu globál Coronavirus ka koñesidu ho naran Covid-19 (Corona Virus Diseas 2019), balu iha liu rekursu maibé nasaun balu lae. Nasaun ida-idak halo preparasaun hasoru pandemia Covid-19.

Ba Governu Australia nia apoiu instala laboratóriu ba teste COVID-19 no formasaun ba pesoál saúde, Prezidente Repúblika hato’o agradesimentu ba tulun ne’e.

Ho apoiu ne’e, Timor-Leste iha kbiit atu prevene no kombate COVID-19 ho lalais tanba la presiza haruka tan teste raan ba Australia. Prezidente Repúblika sei konta nafatin apoiu hosi Governu Australia ninian iha luta hasoru COVID-19.

Investimentu Kubanu iha área saúde, ohin loron rekoñesidu internasionalmente husi ninia medikemantu no Brigada Médiku ne’ebé haruka ba nasaun barak. Medikamentus ne’ebé uza ba hasa’e imunidade hasoru COVID-19 susesu tebes.

Tanba ne’e, Prezidente Repúblika reforsa pedidu husi VIII Governu Konstitusionál husu asisténsia medikamentu hosi Kuba no reforsa Brigada Médika Kubanu iha Timor-Leste.

Prezidente Repúblika fiar katak Governu Kuba sei hatan pedidu husi Timor-Leste atu enfrenta efeitu husi Coronavirus.

Prezidente Repúblika felisita Xina ba maneira kombate COVID-19 no asisténsia ne’ebé fó ba nasaun sira afetadu maka’as ho moras ne’e tanba ho kualifikasaun rekursu umanu, medikamentu no instalasaun.

Estadu halo esforsu prevensaun no preparativus hasoru kondisaun aat liu, tanba ne’e Prezidente Repúblika reforsa pedidu apoiu ekipamentu no medikamentu husi Governu ne’ebé hato’o tiha ona ba Repúblika Popular Xina.

Governu Timor-Leste sei responsabiliza ba kustu sosa ekipamentu, medikamentu no transportasaun.

Timor-Leste, liuhusi Ministra interina Saúde deklara kazu pozitivu COVID-19 na’in-ida iha 21 marsu 2020.

Prezidente Repúblika dekreta Estadu Emerjénsia hahú husi 28 marsu ba durasaun fulan ida. Haree husi esperiénsia nasaun seluk nian ne’ebé tarde foti medida preventiva restritu, Estadu foti desizaun ne’e nu’udar dalan di’ak liu ba prevensaun COVID-19 atu salva sidadaun tomak ne’ebé hela iha nasaun ne’e.

Deklarasaun Estadu Emerjénsia ne’e atu proteje ema no la husik COVID-19 harahun ema ida-idak, Povu no País.

Governu forma tiha ona Komisaun Interministérial ba COVID-19 ho apoiu husi Organizasaun Mundiál Saúde (OMS) ba prevensaun no kombate moras ne’e iha Timor-Leste.

Iha portu entrada sira, Governu harii ekipa tau matan ba sidadaun hotu-hotu ne’ebé tama mai Timor-Leste. Governu harii fatin kuarentena, izolamentu no medikamentus.

Iha 28 marsu, Konsellu Ministru aprova medidas ba regulasaun Estadu Emerjénsia no hahú halo sosializasaun atu sidadaun hotu-hotu bele kumpri.

Notísia Relevante: PR Lú-Olo Dekreta Ona Estadu Emerjénsia Hodi Prevene COVID-19

Jornalista : Cipriano Colo

Editór     : Cancio Ximenes

HAKEREK NO HATÁN

Please enter your comment!
Please enter your name here