Imajen tatoli/Cipriano Colo.

DILI, 30 marsu 2020 (TATOLI)—Dadeersan be buras, fanu ha’u hadeer hosi ha’u-nia muron. Rai be hakmatek. Anin be huu buras. Asu be hatenu. Manu lakateu be hakfuik no hananu la hotu rai. Halo ha’u, kuriozu atu ba haree Sidade Dili nia oin hafoin Prezidente Repúblika, Francisco Guterees Lú Olo, dekreta Estadu Emerjénsia iha Palásiu Prezidente Nicolau Lobato, Bairru Pité, Dili, sábadu (28/3/2020) horisehik.

Ohin, domingu (29/3/2020), loron daruak iha situasaun Estadu Emerjénsia nia laran. Populasaun iha Sidade sulan án iha uma. Sira halo auto-kuarentena iha sira ida-idak nia uma. Dili la’ós sidade maten. Tanba, sei iha populasaun balun mak sei kontra regra Estadu Emerjénsia.

Nu’udar “manu-ain” ida ne’ebé buka halibur infromasaun, ha’u mós hadeer haklelak-án hodi la’o sai hosi uma. Ha’u hamoris no hamanas kuda-oan ho marka KAWASAKI, KLX, ho Númeru Plat K7588 nia mákina.

Maneira prevensaun ba COVID-19 tenke uza máskra bainhira la’o iha luron. Imajen Julião Fernandes

Ha’u sai hosi uma (iha Kampung Baru, Komoro), ha’u-nia trajetu prinsipál mak tenke ba Aeroportu Internasionál Nicolau Lobato. Ha’u sa’e kuda-oan ne’e, tuir dalan hodi hateke ba uma-hun sira iha bairru ne’e, fuik be fuik. Hanesan uma na’in laek. To’o iha Klínika Komoro nia oin, ha’u haree-hetan ema-wa’in hamriik hamutuk iha klínika nia oin. Sira hamriik rabat malu. Governu dehan distánsia sosiál maibé iha fatin ne’e, sira sei bele hamriik “distánsia” laek.

Ah! Husik tesik ba. Ha’u tenke halai lalais ba aeroportu tanba oras-oras tan, Avaiaun Air North hosi Austrália no Royal Bhutan Airlines hosi Singapura sei lalin timoroan sira tama mai Timor-Leste. Ha’u halai lais. Iha dalan ninin, besik atu tama ba Rotunda Komoro be Estátua Prezidente Nicolau Lobato hatuur ba ne’e, ha’u haree mane-klosan isin-boot ida la’o loke liras hanesan buat ida la kona nia. Nia la’o la liga rai. Nia la’o iha dalan publiku maibé la uza máskra.

Ha’u to’o iha Rotunda Komoro, ha’u hateke ba estrada mesak mamuk. Transporte públiku laek. Laiha ema ida la’o ba-mai. Ha’u para minutu balun, observa fatin ne’e, mamuk hosi rohan ba rohan.

Estátua Nicolau Lobato ne’ebé ema hatuur ona iha fatin ida ne’e, nu’udar odamatan-boot Timor-Leste nian. Biar udan, loron manas, nia hamriik nafatin iha fatin ne’e. Biar anin boot, nia hamriik firme.

Hateke ba kalohan be nahe-án iha aeroportu nia leten, ha’u haree-hetan “manu liras besi” ida semo mai ho lian makaas. Ha’u haree lais ba Hand Phone nia ekran, oh, tuku 8:20 ona. Ha’u book án lalalis ba Aeroportu Internasionál Nicolau Lobato, Komoro. To’o iha ne’eba, ha’u haree rai mesak mamuk be mamuk. Manu-lin sira mak semo ba-mai de’it. Ha’u haree ba uma laran, funsináriu no parte imigrasaun sira hala’o hela sira-nia knaar hanesan baibain.

Iha liur, ha’u hein be hein. Hein katak “manu liras besi” (aviaun) Royal Bhutan Airlines Singapura hosi Singapura ne’e sei hatuun pasajeiru timoroan barak ne’ebé fila hikas mai iha sira rain tanba tauk hodi hadook án hosi nasaun sira be afetadu ba COVID-19. Hein be hein. Ema ida la mosu mai. Hein tan uitoan. Ema na’in ida de’it mak hakat sai mai liur. Entaun, Aviaun Royal Bhutan Airlines Singapura ka Druk Air KB 900 hosi Singapura ne’e tula de’it timoroan na’in ida mai Timor-Leste.

Pasajeiru timoroan ida ne’ebé Aviaun Druk Air KB 900 tula hosi Singapura mai Dili, ohin. Imajen Tatoli/Cipriano Colo.

“Horisehik ha’u sosa tikete, ha’u mós la hatene katak ohin ne’e ha’u mesak de’it mak mai Timor-Leste. Ha’u iha aviaun laran ho aeromosa (pramugari) na’in rua no pilotu na’in rua. Ha’u mós hakfodak. Tanba, ha’u mesak mak iha aviaun laran”, haktuir Aseu (la’ós naran loloos) ba Ajénsia TATOLI liuhosi entrevista iha Aeroportu Internasionál Nicolau Lobato, Komoro, Dili, domingu (29/3/2020).

Sá mak ita-boot sente bainhira tuur mesak iha aviaun laran, nia hatán, nia la sente buat ida, tanba viajen naruk halo nia isin kolen be kolen.

Nia haktuir, tuur iha aviaun laran, nia matan dukur tanba kolen tebes. Satán hanoin problema privada ne’ebé nia hasoru ho nia ferikoan ne’ebé hela iha Timor-Leste, halo nia la hanoin buat ida.

Aseu ne’ebé mai husi Amsterdam (kapitál Olanda) iha semana kotuk ne’e transit iha Singapura. Iha singapura, nia tama kuarentena durante semana ida, no tuir teste médiku ho rezultadu normál (negativu) mak ohin loron ne’e, nia semo liu mai Timor-Leste.

“Ha’u Viajen husi Ámsterdam mai Singapura, depois atu liu ba Bali maka ha’u nia billete kanseladu. Nune’e, ha’u iha Singapura loron neen (6) hela iha kuerentena. Depois tuir teste médiku ho rezultadu negativu ka normal. Tanba ne’e mak, ohin, autoridade aeroportu Singapura nian autoriza ha’u liu mai Dili. Ha’u sai hosi Singapura ohin madrugada. Ha’u haluha tuku hira”, dehan Aseu ne’ebé hosi Postu Aministrativu Letefoho, Munisípiu Ermera no durante ne’e nia serbisu iha Reinu Unidu desde 2017 to’o fila mai Timor.

Hafoin hetan infromasaun, ha’u hakbesik án ba parte imigrasaun iha Aeroportu Internasional Nicolau Lobato, Dili. Pesoál ida haktuir Aviaun Royal Bhutan Airlines Singapura ka Druk Air KB 900 hosi Singapura ne’e, aleinde tula pasajeiru ida, tula mós aimoruk husi Singapura mai Timor-Leste.

“Aviaun Royal Bhutan Airlines Singapura ka Druk Air KB 900 hosi Singapura ne’e, orsida sai fali ba Singapura husi Dili tula pasajeiru estranjeiru na’in 16 kompostu hosi feto na’in ualu no mane na’in ualu. Tuir informasaun hosi aviasaun, ohin, Aviaun Citilink ho Sriwijaya sei tama iha Dili tuku 13:00”, dehan pesoál imigrasaun ida hodi haree nia relojiu be bibar nia liman no la’o sees hodi hala’o ninia knaar.

Ha’u hateke hikas ba pasajeiru ne’ebé ohin mai mesak, tuur sedere hela iha kadeira-besi, han hela bukae ne’ebé nia hetan hosi parte relevante. Nia tuur mesak hanesan lia ida la kona. Karik, nia hein hela ekipa interministeriál prevensaun COVID-19 atu tula nia ba fatin kuarentena ne’ebé Governu prepara.

Maibé nia tenke hein, maske hein oras lubuk ida, nia hein pasajeiru seluk ne’ebé mai ho Aviaun CITILINK no Sriwijaya iha tuku 13.00, hafoin ne’e mak sira bele ba hamutuk iha fatin kuarentena.

Hein Pasajeiru Seluk

Hein be hein. Hein to’o iha tuku 13.09, Aviaun Citilink no Aviaun Sriwijaya hosi Denpasar-Bali-Indonézia to’o iha Timor-Leste. Hosi aviaun rua ne’e, tula pasajeiru timoroan hamutuk 92 ne’ebé fila hosi Indonézia, tanba iha Indonézia mós vítima ba COVID-19 hetok aumenta loron ba loron.

Médiku sira rega hela aimoruk ba estudante sira husi Java, Indonézia bainhira to’o iha aeroportu Nicolao Lobato, Dili 29 Marsu 2020. Imajen António Goncalves

“Hosi pasajeiru na’in-92 ne’e, feto ualu no mane neen ho Citilink no na’in 78, feto 30 no mane 48 ho Sriwijaya to’o iha Aeroportu Internasionál Prezidente Nicolau Lobato Komoro. Citilink to’o iha tuku 11:58 no Srywijaya tuku 13:09. Hosi pasajeiru hirak-ne’e, timoroan ne’ebé oras ne’e estuda iha Indonézia no sidadaun Indonézia mane ne’ebé hala’o serbisu iha Timor-Leste hanesan asesór iha Gabinete Primeiru-Ministru. Maibé, daudaun ne’e autoridade saúde sei trava hela iha aeroportu hodi halo identifikasaun, tanba sidadaun refere mai hosi nasaun ne’ebé afetadu COVID-19”, haktuir Vise-Ministra Saúde, Elia Amaral.

Iha fatin hanesan, estudante ne’ebé eskola iha Surabaya, Indonézia, Amelia Marçal Araújo, haklaken haree ba COVID-19 iha Indonézia númeru aumenta beibeik, tanba ne’e sira deside fila maibé kontinua eskola online iha Timor-Leste.

Hateke fali ba kalohan, triste be triste. Nakukun. Bainhira ekipa interministeriál prevensaun COVID-19 atu tula sai pasajeiru hirak ne’e husi aeroportu. Udan hahú monu rai.

Maski udan, ha’u lori ha’u-nia kuda-oan ne’e halai uluk hodi buka dalan. Pasajeiru hirak ne’e atu hatuun iha fatin kuarentena ida ne’ebé loos. To’o iha Rotunda Komoro, maski iha udan laran, ha’u haree Estátua Prezidente Nicolau Lobato nafatin hamriik firme. Nia liman-karuk kaer hela kilat. Iha Nia liman-kuana kaer hela ai ida be iha nia tutun kesi ho Bandeira ida. Bandeira ne’e, anin huu, bidu ba-mai.

Ha’u hateke ba luron, bus be tula pasajeiru hirak ne’e, liu daudaun odamatan-boot ne’e tama Sidade. Ha’u halai tuir bus refere no bus ne’e para hakmatek iha ótel ida iha Hudi-Laran.

Tanba karik lia la han malu, maski iha udan laran, pasajeiru hirak ne’e tula hikas ba bus laran hodi lori ba fatin kuarentena seluk iha Dili laran. Eh, to’o ikus, pasajeiru hirak ne’e bele hakmaan-an iha Hotel Vila-Verde, Dili, hodi kumpri regra kuarentena to’o loron 14 nia laran.

Udan monu rai nafatin. Iha udan laran, ha’u lee lia-foun ida hosi Metinaro katak, sinál iha Manu-Aten hatudu COVID-19 sei la atake ha’u rai doben Timor-Leste.

Katuas lia-na’in sira (kuku) hosi uma-lisan haat (4) hanesan, Luanari, Manutelolau, Wenunuk ho Buimanuk husi Aldeia Wenunuk, Suku Wenunuk, Postu Administrativu Metinaro, Munisípiu Dili, hala’o rituál hodi hamulak no fanu ba rai-lulik ho ninia mahein-sira Timor-Leste nian atu hamriik “satan” no “duni” sai peste letál Coronavirus ka COVID-19 hosi territóriu Timor-Leste.

“Ami ohin hamutuk husu ba rai-lulik, ai-lulik, fatuk-lulik, bee-lulik, tasi-lulik no uma-lulik atu fó mahan matak-malirin ba ami no ita-tomak atu kasu tiha horok-aat COVID-19 ne’ebé mai hosi Xina atake ba too kuaze mundu-tomak. Ami tunu bibi ida, fahi ida no manu ida, haree katak la iha sinál aat-ruma. Buat hotu hatudu dalan luan ba ita-nia lulik-sira lori moras-aat ne’e hosi Timor-Leste”, lia-na’in Adão hateten iha nia-hamulak.

Rona tiha liafoun ida ne’e, maski udan monu nafatin, tanba lorokraik ona, ha’u deside fila hikas ba ha’u-nia uman.

Notísia Relevante: Ohin, Aviaun Druk Air KB 900 Hosi Singapura Tula De’it Timoroan Ida Mai TL

Jornalista : Cipriano Colo

Editór       : Cancio Ximenes

1 KOMENTÁRIU

HAKEREK NO HATÁN

Please enter your comment!
Please enter your name here