Sekretáriu Estadu Protesaun Sivíl, Alexandrino Xavier de Araújo. Imajen/Nelson de Sousa

DILI, 30 marsu 2020 (TATOLI) – Sekretária Estadu Protesaun Sivíl (SEPS) ho nia rekursu hotu prontu iha “linha de frente” atu apoiu esforsu liña ministeriál hodi prevene no kombate pandemia Coronavirus ka COVID-19 ne’ebé fó ameasa boot ba saúde públiku no povu nia moris.

Notísia Relevante :  Governu Estabelese Tan Sentru Krize ba Prevene COVID-19

Sekretáriu Estadu Protesaun Sivíl, Alexandrino Xavier de Araújo, ohin, subliña katak, servisu protesaun sivíl preparadu no prontu hodi koopera ho liña ministeriál-sira hodi halo apoiu ba kombate peste letál COVID-19 iha Timor-Leste.

“Servisu Pretensaun Sivíl sempre prontu iha “linha de frente” hamutuk ho FALINTIL-Forsa Defeza Timor-Leste (F-FDTL), Polísia Nasionál Timor-Leste (PNTL) no Ministériu Saúde atu fó asisténsia iha sitasaun ida agora relasiona ho pandemia COVID-19,” afirma Sekretáriu Estadu Alexandrino Xavier de Araújo, liuhosi konferénsia impresa iha edifísiu SEPS, Caicoli, Dili.

SEPS mós hola parte iha ekipa liña ministeriál COVID-19 no gabinete jestaun krize ne’ebé lidera direita hosi Primeiru-Ministru (PM), Taur Matan Ruak.

“Ami ekipa SEPS ho nia diresaun-sira, hanesan  Korpu Bombeiru, Patrimóniu Públiku Seguransa no Diresaun Dezastre Naturaís, prontu apoiu orden hosi Ministériu Saúde atu kombate COVID-19,” afirma Sekretáriu Estadu Alexandrino Xavier de Araújo.

Nia mós husu ba populasaun hotu labele pániku ho suspeitu COVID-19 ne’ebé pozitivu ida (+1), tanba informasaun ne’ebé fó sai hosi MS katak, daudaun ne’e suspeitu pozitivu ne’e iha ona rekuperasaun saúde.

Nia husu ba Timoroan-sira ne’ebé foin fila hosi nasaun afetadu-sira, atu kolabora ho parte saúde hodi kumpre  auto kuarentena durante loron 14 hodi kontribui ba prevensaun pandemia COVID-19.

Jornalista : Nelson de Sousa

Editór       : Francisco Simões

 

HAKEREK NO HATÁN

Please enter your comment!
Please enter your name here