Provedora Direitu Umanu no Justisa (PDHJ), Jesuína Maria Ferreira Gomes. Imajen/ Egas Cristóvão

DILI, 30 marsu 2020 (TATOLI) – Provedora Direitu Umanu no Justisa (PDHJ), Jesuína Maria Ferreira Gomes, husu ba autoridade exekutór  estadu emerjénsia, hanesan FALINTIL-Forsa Defeza Timor-Leste (F-FDTL) ho Polísia Nasionál Timor-Leste (PNTL),  atu labele viola sidadaun nia direitu-moris.

Notísia Relevante : PDHJ Kontinua Husu Estadu Luta Kombate COVID-19 

Provedora Jesuína Maria Ferreira Gomes, klarifika, estadu emerjénsia la’ós violasaun direitu umanu, tanba estadu emerjénsia ne’e konsta iha Konstituisaun RDTL artigu 25 ko’alia kona-ba esepsaun estadu, tanba ne’e ho peste letál Coronavirus ka COVID-19 tama iha kalamidade públika, ameasa boot saúde públika iha ema-nia vida barak, tanba ne’e mak Prezidente Repúblika tenke foti estadu emerjénsia hodi halo prevensaun.

Nia esplika, implementasaun estadu emerjénsia ne’ebé halo suspensaun parsialmente ba iha ezersísiu direitu liberdade no garantia fundamental sidadaun-sira nian. Tanba ne’e, iha dekretu Prezidente Repúblika númeru 29/2020 iha ne’ebá halo espesifikasaun ba direitu-sira ne’ebé hetan suspensaun, hanesan, suspensaun direitu sirkulasaun internasionál, territóriu, reuniaun no manifestasaun, liberdade kultu, rezisténsia, direitu inisiativa propriedade ekonómika privada ho traballadór-sira.

“Suspensaun ne’e parsialmente, signifika katak, latotál, maibé durante implementasaun estadu emerjénsia, direitu vida sidadaun nian labele hetan prejudika,” hateten Provedora Jesuína Maria Ferreira Gomes, hodi responde Ajénsia Tatoli via telefónika, ohin.

Nia esklarese-tan katak, direitu moris (vida) sidadaun ne’ebé labele hetan prejudika iha implementasaun estadu emerjénsia tuir artigu 25 númeru lima (5) maka hanesan, direitu ba moris, direitu integridade fízika, direitu kapasidade sivíl no sidadania, direitu naun retroatividade ba lei penál, direitu prosesu kriminál, direitu labele sujeita ba tortura eskravatura ka servidaun, tratamentu-aat no labele iha diskriminasaun.

Notísia Relevante : PDHJ Husu Mídia Fahe Informasaun Pratika Di’ak Prevensaun COVID-19

“Kuandu akontese ba implementasaun violasaun direitu sira-ne’e, maka ita dehan violasaun direitu umanu,’’ esplika Jesuína Maria Ferreira Gomes.

Provedora Jesuína Maria Ferreira Gomes hateten, bazeia dekretu Prezidente Repúblika, governu halo-fali dekretu governu ida ho númeru 3/2020 para atu regula medida governu ne’ebé mak foti hodi implementa.

Nia hatutan, iha dekretu governu nian, iha suspensaun no provizaun balun, maibé mós sei fó dalan ba sidadaun-sira nafatin ezerse sira-nia direitu hanesan, presiza bele ba sosa sasán liu-liu sasán nesesidade báziku. Maibé, tuir regra-sira ne’ebé dekretu governu regula hanesan la’o tenke uza máskara inklui loja-sira mós tenke kria regra hodi prevene COVID-19.

Papél PDHJ nian, Jesuína Gomes esplika, iha ámbitu estadu emerjénsia tuir lei númeru 3/2008 iha artigu hitu (7) ho artigu 19 hanesan órgaun fiskalizasaun, kontinua haree ba direitu moris  sidadaun nian liga ba direitu umanu.

“Durante estadu emerjénsia PDHJ servisu iha uma no garante nafatin sidadaun sira-nia direitu asesu ba iha servisu PDHJ nian,” nia hateten.

PDHJ kontinua halo monitorizasaun ba kumprimentu hosi komunidade, autoridade relevante kona-ba implementasaun estadu emerjénsia iha territóriu-laran.

To’o ohin loron, Provedora Jesuína Gomes, hateten, PDHJ seidauk rejista kazu ruma kona-ba violasaun direitu umanu liga ba vida sidadaun sira-nian.

“Apela ba sidadaun hotu, karik sai vítima ba violasaun atu hato’o keixa ba iha PDHJ para prosesu tuir prosedimentu,” Provedora Jesuína Gomes hateten.

Hatán kona-ba fasilidade no atendimentu abitante sira-nian iha kuarentena-laran ne’ebé dala-balun viola direitu moris sidadaun nian, Jesuína Maria Ferreira Gomes, hateten, PDHJ halo observasaun no hato’o ona proposta ba Ministériu Saúde atu ajuda ekipamentu protesaun pesoál hanesan máskara no luvas, maibé to’o agora PDHJ seidauk simu keixa hosi abitante-sira ne’ebé submete ona ba kuarentena.

Nia hatutan tan, funsionáriu PDHJ latama ba iha fatin kuarentena, maibé PDHJ iha komunikasaun ho ofisiál saúde-sira iha kuarentena no abitante sira-balun iha kuarentena hodi relata informasaun ba PDHJ.

Jornalista : Nelson de Sousa

Editór       : Francisco Simões

HAKEREK NO HATÁN

Please enter your comment!
Please enter your name here