Komisáriu Faustino da Costa ho nia ekipa halo inspesaun ba loja-sira iha kapitál Dili, segunda (30/03/2020). Imajen/Eugénio Pereira

DILI, 30 marsu 2020 (TATOLI)- Movimentu públiku iha kapitál Dili sei hatudu nafatin “violasaun” ba regra Estadu Emerjénsia. Tanba ne’e, Komandante  Jerál Polísia Nasional Timor-Leste (PNTL), Komisáriu Faustino da Costa, alerta dala-ida tan, atu públiku   obedese ba prosedimentu-sira Estadu Emerjénsia nian.

Notísia Relevante :   Medida Ezekusaun Estadu Emerjénsia Relasiona ho COVID-19

Komisáriu Faustino da Costa uza mikrofone halo aviza ba públiku atu obedese ba regra Estadu Emerjensia. Imajen/Mídia PNTL

Tuir observasaun Komisáriu Faustino da Costa nian iha terrenu kapitál Dili,  hatudu katak, abitante balun uza motor ka karreta la utiliza máskara no balun fali tama-sai loja ka supermerkadu no merkadu tradisionál, sira la fase-liman, mezmu loja na’in ka iha fatin públiku tau ona sabaun ho bee-moos atu fase-liman.

Komisáriu Faustino da Costa, ho nia ekipa mós halo vizita tama-sai loja no supermerkadu-sira iha Dili laran hodi sosializa ba públiku kona-ba importánsia fase-liman, uza máskara no importánsia distánsia sosiál atu prevene Coronavirus ka COVID-19.

“Ita preokupa tebes. Tuir loloos movimentu iha estadu emerjénsia labele hanesan ne’e, maibé ita haree movimentu agora daudauk ne’e kuaze hanesan fali tempu baibain,” hateten Komisáriu Faustino da Costa, ohin, ba jornalista-sira iha sentru komersiál balun iha area Audian, Dili.

Komandu PNTL koloka ona membru unidade PNTL hotu- hotu tun uza farda kompletu no máskara hodi asegura movimentu transporte no ema-nian iha ámbitu Estadu Emerjénsia.

PNTL mós halo pasa revista (auto stop) iha estrada protokolu iha kapitál Dili hodi fó xamada atensaun ba públiku sira ne’ebé uza motór atu evita tula ema no tenke uza máskara.

Komisáriu Faustino afirma tan, Komandante PNTL sei la tolera bainhira públiku la kumpre regra no sei halo movimentu ba mai la obedese ba sentidu Estadu Emerjénsia.

“Hotu- hotu tenke kumpre regra ne’ebé governu fó sai. Loja-sira loke karik tenke rega fatin sira no tenke prepara bee-moos ho sabaun iha loja-oin atu kompradór-sira fase-liman no tenke garante distánsia sosiál,” nia hateten.

Komandante ne’e mós lamenta iha ofisina balun kontinua loke no  PNTL fó kedas xamada ona hodi taka hodi haruka traballadór idak-idak fila ba uma hakmatek iha uma hodi kontribui ba prevene pandemia COVID-19.

“Ami husu ona dealer (fatin fa’an karreta ho motor) ho ofisina-sira  tenke taka, no movimentu sira ne’ebé la nesesita la’o tun sa’e iha Dili laran mós ami sei haruka para hotu lalika sai. Se mak la kumpre, ami sei haree, ita la hatene keta halo moras ne’e mós la’o arbiru hela,” afirma Komisáriu Faustino da Costa.

Tuir observasaun Ajénsia Tatoli nian  iha kapitál Dili hatudu katak, iha segunda (30/03/2020), ema barak halo movimentu tama loja ho razaun atu kompras nesesidade báziku hanesan, labarik sira nia susubeen, foos, mina, supermie no seluk-seluk tan.

Jornalista : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here