Xefe Departementu Abastesimentu, Servisu Agua no Saneamentu (SAS), Francisco Xavier Pereira. Imajen/Osória A.Marques

DILI, 30 marsu 2020 (TATOLI)–Xefe Departamentu Abastesimentu Água Munisípiu Dili, Francisco Xavier Pereira informa, relasiona ho estadu emerjénsia ne’ebé aplika ona iha loron 28 marsu-26 abril 2020 ne’ebé limita ema-nia movimentasaun maka DNSA monta profil 10 iha fatin publiku sira iha Dili laran hodi bele prevene COVID-19 ho fase-liman moos.

Nia hatutan, maski DNSA monta profil hirak ne’e iha fatin publiku maibé to’o loron daruak ba implementasaun estadu emerjénsia refere, ema-nia movimentasaun menus hodi asesu ba fatin publiku sira ne’e, entaun DNSA iha polítika ida atu muda fali profil hirak ne’e ba fatin sira ne’ebé komunidade barak halo movimentu.

“Maski movimentu ladún iha ona maibé antes ne’e ami hanoin tau ona iha dalan publiku hanesan terminál no merkadu no fatin rame hanesan jardín sira hodi nune’e ema bele fase liman molok tama no sai. Maibé, estadu aplika tiha estadu emerjénsia entaun vizitante ba fatin rame hanesan jardín laiha ona. Entaun, ita haree ladún efetivu, nune’e ami mós hanoin atu muda fali ba fatin sira ne’ebé komunidade hela barak,” dehan Xefe Departamentu Abastesimentu Água Munisípiu Dili, Francisco Xavier Pereira, ba Ajénsia TATOLI liuhosi telefone, ohin.

Ba komunidade iha bairru balun ne’ebé bee menus, Xefe Abastesimentu ne’e hatete, DNSA sei halo survei ba komunidade nia hela fatin. Bainhira karik movimentu iha bairu ne’e rame no makaas entaun parte DNSA sei hanoin atu monta profil iha fatin refere.

“Ita-nia ekipa tún halo survei tiha lai ba fatin ka bairu para depois mak ita hanoin monta profil karik iha movimentu makaas ka besik merkadu ruma,” nia dehan.

Entretantu, Diretór Diresaun Nasionál Servisu Água (DNSA), Eduardo Dias Ximenes hatete komunidade ne’ebé hela iha bairu bele uza sira bee rasik tanba DNSA instala hotu ona sistema bee ba komunidade iha ona.

“Ita-nia komunidade ne’ebé hela iha bairu ha’u hanoin sira bee iha tanba sistema bee nian ba sira-nia fatin iha, soké iha komunidade iha bairru balun ida-rua mak ruma laiha tanba iha falansu ruma,” nia hateten.

Notísia Relevante: DNSA Hamutuk ho UNICEF Monta Profil 10 iha Dalan Publiku

Jornalista : Osória Marques

Editór      : Cancio Ximenes

HAKEREK NO HATÁN

Please enter your comment!
Please enter your name here