Ministru Obra Publika, Salvador Eugênio Soares dos Reis Pires. Imajen Tatoli/Florencio Miranda Ximenes.

DILI, 30 marsu 2020 (TATOLI) – Iha períodu Estadu Emerjénsia, Ministériu Obra Públika (MOP) deside ona atu fó subsídiu eletrisidade pre-pagu gratuita $15 ba kliente hamutuk 160.555 iha territóriu laran, nune’e kliente sira la presiza ba sosa pulsa atu kumpre distánsia sosiál no prevene moras COVID-19 husi ema ba ema.

Desizaun MOP ne’e, ho baze ba Dekretu Governu iha artigu 26, ba medida ezekusaun deklarasaun Estadu Emerjénsia ne’ebé públika imediata iha Jornál Repúblika hafoin aprova husi Konsellu Ministru iha loron sábadu (28/03).

“Normalmente rendimentu kada-fulan ne’e rekolla millaun $2,4, ne’ebé ami ohin deside halo kalkulasaun aritmétika katak ita bele fó subsídiu ba ita-nia kliente hamutuk 160.555, ba kada konsumidór iha territóriu Timor-Leste ho montante $15”, tenik Ministru Obra Públika, Salvador Eugênio Soares dos Reis Pires, hafoin enkontru ho ekipa tékniku iha edifísiu Eletricidade de Timor-Leste (EDTL), iha Caicoli, segunda ne’e.

Notísia Relevante: MOP Propoin Asesu Gratuita ba Ahi no Bee-Moos Durante Estadu Emerjénsia

Ministru Salvador adianta, daudaun MOP liuhosi ekipa tékniku prodús ona sistema token atu koopera ho operadór telekomunikasaun tolu hanesan Timor-Telecom, Telemor no Telecomcel atu bele fasilita sistema ne’e hodi manda kada konsumidór.

“Ami-ninia ekipa tékniku ko’alia ho operadór telekomunikasaun atu fasilita ita nia komunikasaun liuliu manda mensajen ba ita-nia kliente atu sira haruka rejistu númeru kontadór nian mai EDTL, hafoin EDTL haruka token ne’e ba sira atubele enxe iha sira-nia uma”, nia akresenta.

Tuir Ministru ne’e, EDTL sei uza mekanizmu sistema token hodi transfere pre-pagu $15 ba kada konsumidór sira.

“Ita la haree ba kategoria maibé klinte hotu-hotu subsídiu hanesan de’it ho montante $15 ba kada kliente iha Timór laran tomak”, Salvador akresenta.

Subsídiu ne’e, Ministru realsa, prevee atu prevene konsumidór sira labele sai no halibur iha fatin ida de’it hodi sosa pulsa atubele prevene kontaminasaun COVID-19.

“Agora ita-nia dezafíu ida mak oinsá atu halais liu haruka pulsa token ne’e ba ita-nian kliente sira ka konsumidór sira iha kada uma-kain iha territóriu tomak”, nia salienta.

Ho nune’e, Ministru Salvador refere liután, haree ba preparasaun ne’e sei presiza tan loron-rua tan atu manda pre-pagu ba kada kliente hafoin operadór telekomunikasaun estabelese númeru fiksa atu kliente sira manda no rejistu nia númeru kontadór sira liuhosi liña telekomunikasaun sira atu EDTL bele manda pre-pagu ba kada kliente atu sira bele enxe ba kontadór iha kada uma-kain.

“Ha’u apela ba konsumidór atu pasiénsia uitoan tanba ami sei halo esforsu tomak atu halais no posível atu ita implementa tarefa ka subsídiu ida-ne’e ba konsumidór sira”, nia dehan tan.

Kona-ba bee-moos, nia informa, sei fó subsídiu ba kliente ne’ebé iha ona kontadór ka liga ona ho Sistema Diresaun Jerál Água no Saneamentu (DGAS, sigla portugés) katak fulan-abríl sei la halo pagamentu.

Jornalista: Florencio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here