Ministru Reforma Lejizlativa no Asuntu Parlamentár no Ministru Koordenadór Asuntu Ekonómiku interinu, Fidelis Manuel Leite Magalhães konvoka reuniaun ho ajénsia ne’ebé prepara ai-han durante Estadu Emerjénsia. Imajen Tatoli/Antónia Gusmão

DILI, 30 marsu 2020 (TATOLI) – Ministériu Koordenadór Asuntu Ekonómiku (MKAE) konvoka reuniaun ho ajénsia ekonómiku sira ne’ebé prepara nesesidade bázika durante Estadu Emerjénsia ba kombate pandemia globál COVID-19.

Ministru Koordenadór Asuntu Ekonómiku interinu, Fidelis Manuel Leite Magalhães, hateten nia parte konvoka reuniaun tanba hetan fiar husi Konsellu Ministru atu dezenvolve pakote ekonómiku ba nasaun, ne’ebé pakote ne’e la’ós inklui de’it empreza sira ninia preokupasaun maibé mós traballadór sira.

“Ita tenke haree traballadór sira ninia preokupasaun no tenke haree situasaun atuál ninia impatu ba traballadór oinsá. Tanba iha senáriu rua ka tolu. Senáriu ida maka bainhira COVID-19 la mai Timor-Leste mós impatu ekonómiku ne’e negativu ona, tanba Coronavírus ne’e akontese iha mundu tomak no lori impaktu negativu ba ekonomia mundiál, entaun lori impatu indireta ba traballador sira”, hateten Ministru Fidelis hafoin reuniaun ho ajénsia ekonómiku sira iha salaun TradeInvest, segunda ne’e.

Atuál Ministru Reforma Lejizlativa Asuntu Parlamentár ne’e adianta, bainhira surtu COVID-19 ne’e maka mai ho vítima oituan de’it no deskobre ona ai-morukho kustu naton, maibé nafatin afeta maka’as ba sidadaun sira, tanba surtu iha rai-laran sei lori vítima barak no sei lori tempu atu hetan vasina, entaun ninia impatu ekonómiku ne’e boot.

“Objetivu reuniaun ho ajénsia no mós Sekretaria Estadu ba Formasaun Profisionál (SEFOPE) hodi haree ba asuntu tolu maka hanesan Dekretu Governu ne’ebé mak hatuur no ninia impaktu ba setór ekonómiku no progresu setór ekonómiku ne’e rasik ba empreza, loja, no merkadu sira, no konsege halo tuir dekretu ne’ebé iha. Dekretu ne’e ninia impatu ba sira oinsá? Tanba Governu liuliu MKAE tenke atentu ba dezenvolvimentu situasaun nian, liliu setór ekonómiku durante situasaun emejénsia”, subliña Fidelis.

Nia relata liután, MKAE haree ba ekipa husi AIFAESA, Diresaun Jerál Komérsiu no mós Sentru Lojístika Nasionál (CLN, sigla portugés) maka iha informasaun direta hosi empreza sira, sidadaun baibain, merkadu, nune’e sira bele rona direta hanoin no hatene situasaun reál ohin loron nian.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here