Ministru Reforma Lejizlativa no Asuntu Parlamentár no Ministru Koordenadór Asuntu Ekonómiku interinu, Fidelis Manuel Leite Magalhães. Imajen Tatoli/Egas Cristovão

DILI, 30 marsu 2020 (TATOLI) – Maski Prezidente Repúblika (PR), Francisco Guterres Lú-Olo dekreta ona Estadu Emejénsia no Governu rasik prepara ona medida sira ne’e rasik, maibé atividade sira iha loja no iha merkadu sei la’o ho normál.

Tanba ne’e, Ministru Koordenadór Asuntu Ekonómiku interinu, Fidelis Manuel Leite Magalhães, hateten Governu autoriza ona loja sira atubele loke no atividade iha merkadu sei la’o ho normál hodi fó oportunidade ba populasaun prepara ai-han bainhira Governu deside taka totál atividade sira.

Maski atividade la’o normál, maibé Governu husu ba empreza sira ne’ebé iha loja no komunidade sira atu kumpre regra ne’ebé estabelese hanesan tenke uza máskara, tama loja tenke fase liman no hambrik fó espasu metru ida entre ema ho ema.

“Medida ne’ebé Governu foti hodi husik komunidade sei hala’o atividade tanba sira ne’e sei kontribui atu ita-nia sosiedade sira bele prepara ai-han ba sira ninia nesesidade, maibé kuandu tempu aumenta Governu sei halo medida forte liután, dekretu ezekusaun ne’e foin Dekretu Governu de’it katak bainhira nesesidade mosu atu ita tenke bandu atividade barak liután, maka Governu halo tuir Dekretu Governu ne’ebé ho fásil hodi altera no publika hodi tama iha efeitu”, esplika Ministru Fidelis hafoin sorumutu ho ajénsia ekonómiku sira iha salaun enkontru TradeInvest, segunda ne’e.

Tuir governante ne’e, Governu sei aumenta medida neneik fazeadamente, to’o bainhira médiku sira dehan tenke bandu liután movimentasaun, maka foin Governu deside taka totál atividade.

Nune’e, bainhira la halo tuir no la kumpre regra sira ne’e maka Governu sei aplika regulamentu forte liután no sei hatún FALINTIL-Forsa Defeza Timor-Leste (F-FDTL), Polisía Nasionál Timor-Leste (PNTL), inklui Autoridade Inspesaun no Fiskalizasaun Atividade Ekonómika Sanitária no Alimentár, Institutu Públiku (AIFAESA,IP) tun direta hodi observa no aplika sansaun.

“Bainhira Governu bandu taka sedu atividade no loja sira maka ita-nia populasaun barak sei sai vítima, tanba ita-nia populasaun barak mak depende de’it ba vida negósiu loron-loron nian, ne’ebé ameasa ba COVID-19. Tanba ne’e maka Governu husu ba setór privadu no ba vendedór sira tenke halo tuir regra no bainhira la halo tuir maka F-FDTL, PNTL no AIFAESA sei tun direta, inpoen hodi fó sansaun no obriga tuir regra sériu liu maka taka atividade”, subliña atuál Ministru Reforma Lejizlativa no Asuntu Parlamentár ne’e.

Entretantu tuir nota ne’ebé Agência Tatoli asesu husi pájina ofisiál katak supermerkadu no loja sira iha Sidade Dili hanesan W-Four, Jaco Supermerkadu Hudi-laran, Jacinto, no Mey Mart fó sai katak relasiona ho Estadu Emejénsia ba pandemia COVID-19 maka loja sira ne’e sei loke hahú iha dader hahú tuku 08:00 dader to’o lokraik tuku 17:00.

Alende ne’e, tuir observasaun Agência Tatoli nian katak, iha lorokraik iha parte Audian, negosiante ambulante sira kontinua fa’an sasan iha trotoár leten, nune’e mós iha Merkadu Taibesi.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here