Madre Provinsiál Salejiana Filha Maria Auxiliadora (FMA), São João Paulo II, Comoro, Sebastiana Costa Soares . Imajen/Ciprioano Colo

DILI, 30 marsu 2020 (TATOLI)-Vise Provinsiál Salejiana Filha Maria Auxiliadora (FMA) dadaun ne’e oferese ona kuartu sanulu resin haat ba Ministériu Saúde hodi sai fatin kuarentena ho folin $ 14.00 kada loron ba abitante sira atu hela durante loron 14 hodi prevene coronavirus.

Iha domingo (29/03/2020) Estudante Feto Timoroan hamutuk na’in 14 maka hela ona iha Konventu madre FMA, São João Paulo II, hafoin fila hosi Indonézia ho aviaun Citilink no Sriwijaya no mós liuhosi Fronteira Terrestre Motain, Postu Administrativu Balibo, Munisípiu Bobonaro.

Notísia Relevante :MS Seidauk Kontrata Kuarentena iha Otél Audian

“Kuartu 14 ne’e agora ita oferese ba governu nu’udar fatin kuarentena, maibé hosi  kuartu 13  estudante feto mak uza no kuartu ida fó ba parte seguransa feto mak hela,”informa Madre, Sebastiana Costa Soares, ba TATOLI, iha Konventu Comoro, segunda (30/03/2020).

Maske seidauk iha kontratu formal ho Governu maibé nia parte oferese ona fatin ba Timoroan hodi hela durante loron 14, kada kuartu $ 14.00 multiplika ba kuartu 14 no durante loron 14 ho folin $ 2.744.

Notísia Relevante :MS Kontratu Otél Villa-Verde Kada Kuartu $ 50

Maibé diferénsa iha Otél Fortuna Hudi-Laran Dili oferese kuartu ba MS ho folin $ 40.00 kada loron.

Responsavél, Otél Fortuna, Ling Shen Hua ‘Ahua’ ba TATOLI, relata antes ne’e kada kuartu ho folin $ 50.00 maibé tenke redúz ba $ 40.00 hodi tulun governu ba prevene COVID-19.

Notísia Relevante :Ema Na’in 102 Kuarentena Iha Novo Horizonte

“Tanba interese estadu Timor-Leste atu kombate moras coronavirus hodi salva ema hotu iha nasaun ne’e entaun ami hatun ba $40 kalan ida kada kuartu,” dehan Ahua, iha Hudi-Laran, segunda (30/03/2020).

Nia parte aprezenta ona presu ne’e ba Ministériu Saúde maske to’o ohin seidauk iha kontratu formal ida entre parte rua.Dadaun ne’e Otél Fortuna oferese ona kuartu hamutuk 19 ba ema na’in 52 hodi hela.

Notísia Relevante :D’City Hotel Fó Diskontu Ba Governu

Nia dehan, kada kuartu $ 40.00 soma ba kuartu 19 multiplika loron 14 hamutuk $ 10.640.

Enkuantu, iha Otél Audian oferese kuartu ba governu ho presu $ 60.00 kada loron, enkuantu iha Otél Vila-Verde kada kuartu $ 50.00.

Jornalista : Tomé Amado

Editór       : Agapito dos Santos

HAKEREK NO HATÁN

Please enter your comment!
Please enter your name here