Komandante Jerál PNTL, Komisáriu Faustino da Costa. Imajen/Egas Cristovão

DILI, 29 marsu 2020 (TATOLI) – Atu kumpre distánsia sosiál hodi prevene surtu COVID-19, Komandu Jerál Polísia Nasionál Timor-Leste (PNTL), Komisáriu Faustino da Costa, apela ba motorizada sira atu kumpre regra balun hanesan motorista labele tula ema.

“Ha’u hanoin distánsia sosiál tenke tuir Dekretu-Lei númeru 3, katak tuir loloos ema ne’ebé maka lori motór, labele tula tan ema seluk”, dehan Komandu Jerál Faustino, hafoin ramata enkontru ho ekipa interministeriál, iha Sentru Konvensaun Dili (CCD, sigla portugés), domingu ne’e.

Nune’e, nia parte husu ba motorista hotu atu kumpre regra ne’ebé maka estabelese ona, tanba PNTL komesa ezekuta ona orden balun hodi halo sirkulasaun iha rai-laran, liga ho Estadu Emerjénsia.

Alende ne’e, Polísia mós sei ezekuta orden balun liuliu ba populasaun ne’ebé mak kontinua halibur malu ba jogu oin-oin no seluk tan.

Nia adianta, kona-ba mobilizasaun veíkulu husi munisípiu, kuandu laiha autorizasaun husi parte kompetente maka veíkulu sira husi Dili sei la bá munisípiu, nune’e mós husi munisípiu sira mai iha Dili.

“Ha’u hanoin ita aviza ona ba Komandu Munisípiu sira hotu no sira hatene ona. Tanba ne’e hahú aban ne’e autorizadu mak bele movimentu husi Dili bá munisípiu ka kontratáriu”, nia afirma.

Nia reforsa, Dekretu-Lei númeru 3, autoriza veíkulu sira husi munisípiu ne’ebé maka hola nesesidade báziku no kompañia operadór telekomunikasaun tolu hanesan Timor Telecom, Telkomcel no Telemor maka bele halo movimentasaun.

Jornalista : Domingos Piedade Freitas

Editora: Julia Chatarina

HAKEREK NO HATÁN

Please enter your comment!
Please enter your name here