Prezidente Parlamentu Nasionál, Arão Noé de Jesus da Costa Amaral. Imajen Tatoli/António Gonçalves

DILI, 30 marsu 2020 (TATOLI)—Prezidente Parlamentu Nasionál, Arão Noé de Jesus da Costa Amaral informa, Komisaun C (Finansa Públika) seidauk konklui relatóriu no pareser ba pedidu levantamentu hosi fundu petrolíferu millaun $250.

“Kona-ba pedidu levantamentu ne’e Komisaun C informa katak seidauk konklui sira-nia relatóriu no pareser, aban tuku 10:00 dadeersan mak bele reuni para aprova tanba tékniku sira presiza tempu atu konklui relatóriu no pareser ne’e. Se aban dadeersan Komisaun C aprova entaun aban lokraik iha reuniaun líder bankada para haree ajenda plenária extraordinária ba kuarta-feira nian”, dehan nia ba jornalista sira, iha Parlamentu Nasionál, segunda ne’e.

Prezidente Parlamentu Nasionál, hateten bainhira relatóriu no pareser ne’e finaliza ona entaun líder bankada sira sira sei hala’o reuniaun hodi deside ajenda ba faze jeneralidade no espesialidade.

Antes ne’e, Vise-Prezidente Parlamentu Nasionál, Maria Angelina Sarmento, hosi pediu millaun $250 ne’e, sei aumenta tan proposta adisionál millaun $100 hodi antesipa despeza sira hasoru COVID-19.

Nia dehan, proposta adisionál ne’e, Komisaun C sei tau iha nia pareser ho razaun fundamentada bazeia ba rekomendasaun husi Ministra Finansa Ein-ezersísiu, Sara Lobo Brites no Governadór Banku Sentrál Timor-Leste (BCTL-sigla portugés), Abrão Vasconselos.

Tuir nia, proposta millaun $ 100 ne’e, Banku Sentrál Timor-Leste ho Ministériu Finansa pronúnsia katak di’akliu halo pedidu levantamentu adisionál tan ba Banku Federál Amérika hodi transfere ka transporta osan ne’e mai banku sentrál nu’udar rezerva de’it, tanba iha Amérika mós aplika ona lockdown.

Tanba, Vise-Prezidente Parlamentu Nasionál, Deputada Maria Angelina Sarmento Lopez hateten, sei la fásil transporta osan mai Timo-Leste tuir pedidu normál nian entaun deputadu sira tenke apresia no aprova pedidu refere.

“Sei la fásil atu transporta osan mai Timor-Leste tuir períodu normál nian. Depois faze tuir mai mak papél deputadu sira-nia atu apresia no aprova pedidu refere iha plenária. Agora atu aprova ka la aprova, depende ba deputadu sira-nia konxiénsia atu loke fuan hodi haree nesesidade urjénsia sira-nee. Ne’ebé, obriga estadu tenke foti medida, atu oinsá serbí nia povu iha situasaun emerjénsia hanesan agora,” Vise-Prezidente Parlamentu Nasionál, Deputada Maria Angelina Sarmento Lopez, informa  ba jornalista sira, iha Dili, domingu ne’e.

Notísia Relevante: PN Sei Kontinua Debate Pedidu Levantamentu

Jornalista : Evaristo Soares Martins

Editór      : Cancio Ximenes

HAKEREK NO HATÁN

Please enter your comment!
Please enter your name here