DILI, 30 marsu 2020 (TATOLI)- Komandante Jerál Polísia Nasionál Timor-Leste (PNTL), Komisáriu Faustino da Costa, fó ona orientasaun ba Komandu Polísia Munisípiu 12 inklui Rejiaun Administrativu Espesiál Oe-Cusse Ambenu (RAEOA) atu asegura no ezekuta orden Estadu Emerjénsia.
Notísia Relevante : Movimentu Públiku Kontinua “Viola” Regra Estadu Emerjénsia
Orden Estadu Emerjénsia ne’e fó kompeténsia komandu polísia idak-idak iha munisípiu-sira halo kontra másimu atu evita ema nia movimentu no asegura distánsia sosiál hodi luta kontra pandemia Coronavirus ka COVID-19.
“Movimentu hotu- hotu tenke para, no la autoriza ema tama sai no halo viajen ba-mai munisípiu,” afirma Komisáriu Faustino da Costa, ba jornalista, ohin, iha Audian, Dili.
Nia dehan, Komandu PNTL mós servisu hamutuk ho Ekipa Ministériu Saúde no Organizasaun Mundiál Saúde (OMS) halo aviza nafatin atu públiku koopera no kontribui ba prevensaun peste letál Coronavirus ka COVID-19.
Komisáriu Faustino nia observasaun, foin lalais ne’e, iha Merkadu Liquiça hatudu katak, povu kontinua halo atividade fa’an sasán no maioria la kumpre prosedimentu Estadu Emerjénsia. Tanba ne’e, nia fó ona orientasaun ba komandu polísia Liquiça, atu tama-sai merkadu aviza ba povu taka loja no hapara atividade hotu-hotu.
Komandu PNTL mós kontinua akompaña no orienta Komandante Unidade Polísia Fronteira (UPF) hetan apoiu hosi FALINTIL-Forsa Defeza Timor-Leste (F-FDTL) mantein kontrola movimentu ema tama-sai ilegál.
“Ita nia UPF hetan apoiu hosi F-FDTL hodi kontrola área-sira ne’ebé ema halo movimentu ba mai liu dalan ilegál,” Faustino da Costa tenik.
Iha parte seluk, Komandante Faustino hatutan, observasaun jerál situasaun seguransa iha territóriu Timor-Leste kontinua kontroladu nafatin no hakmatek.
Polísia Aileu Asegura Orden Estadu Emerjénsia
Iha parte seluk, Komandante Munisípiu Aileu, Superintendente Jorge Monteiro, hateten, nia-parte asegura orden ne’ebé estabelese iha instituisaun PNTL tuir regra Estadu Emerjénsia.
Komandante Jorge husu ba populasaun Aileu atu hakmatek iha uma durante tempu Estadu Emerjénsia no la autoriza atu halo movimentu sai hosi Aileu ba munisípiu seluk.
Komandu Polisia Aileu rasik garante nafatin pás no estabilidade hodi halo seguransa oras 24 nia-laran liuhosi pasa revista ka auto stop no halo avizu ba povu hodi kontribui ba prevene pandemia COVID-19.
Jornalista : Eugénio Pereira
Editór : Francisco Simões
