Imajen Tatoli/Osória Marqaues.

DILI, 30 marsu 2020 (TATOLI)–Manajer Hotel Luz Clarita, Paul Móniz hateten, daudaun ne’e Hotel Lux Clarita nakfilak sai fatin kuarentena ba timoroan sira ne’ebe fila hikas mai hosi nasaun afetada COVID-19 sira.

Nia hatutan, Hotel Luz Clarita hetan kontrata husi Governu Timor-Leste ba kada kuartu presu la hanesan (diferensa) bazeia ba medida kuartu nian.

“Iha restotante Luz Clarita presu ba kada kuartu la hanesan tanba kuartu kiik iha kama rua no kuartu boot iha kama tolu. Kuartu kiik presu $30 no kuartu boot $40 inklui matabixu,” dehan Manajer Luz Clarita, Paul Moniz, ba Ajénsia TATOLI iha Bairru dos Grilhos, Dili, ohin.

Imajen Tatoli/Osória Marqaues.

Nia dehan, Hotel Luz Clarita iha kuartu 12 kompostu husi kuartu kiik iha kuartu haat no kuartu boot iha kuartu ualu.

“Kuartu 12 ami oferese hotu ba kolega sira husi nasaun afetadu COVID-19. Horisehik simu ema na’in 26 kompostu hosi feto ida no mane 25,” nia informa.

Kona ba hahan, nia haktuir, Hotel Luz Clarita mós oferese matabixu maibé hahan meudia no kalan nian oferese husi kompañia ne’ebé mak manan tender.

“Iha ne’e ami prepara hahan ba matabixu de’it. Dehan kompañia mak oferese hahan ba sira iha kuarentena. Maibé, ami husi Luz Clarita mós prontu oferese hahan ba sira na’in 26, karik Governu hatán,” nia sujere.

Jornalista : Osória Marques

Editór      : Cancio Ximenes

HAKEREK NO HATÁN

Please enter your comment!
Please enter your name here