Diretór Ezekutivu HNGV, Aniceto Barreto. Imajen António Goncalves

DILI, 30 marsu 2020 (TATOLI)-Maske Prezidente Repúblika, Francisco Guterres Lú Olo, dekreta ona estadu emerjénsia durante fulan-ida, maibé la afeta ba funsionamentu servisu Ospitál Nasionál Guido Valadares (HNGV-sigla portugés)  hodi atende pasiente sira durante oras 24 nia laran.

Estadu Emerjénsia ne’e hahú implementa ona iha loron 28 fulan-marsu no sei remata iha loron 26 fulan-abríl  2020.

Diretór Ezekutivu HNGV, Aniceto Barreto, hateten ekipa médiku kontinua servisu hodi fó atendementu no tratamentu saúde ba pasiente hanesan bain-bain.

HNGV. Foto google

Maibé kona-ba vizitante sira, HNGV fó ona limitasaun ba família pasiente atu vizita ema moras labele liu na’in ida hodi prevene pandemia mundiál COVID-19.

Tuir  orariu kada loron vizitante sira bele halo vizita ba pasiente dala ida de’it hahú tuku 11:00 to’o 14:00, oras Timor Leste.

“Liu oras ne’e labele ona vizita pasiente sira iha HNGV tanba ne’e ita tenke prevene moras sira ne’ebé mak espalla iha mundu liu-liu COVID-19,” informa Aniceto Barreto ba jornalista iha HNGV segunda (30/03/2020).

Iha parte seluk, HNGV mós apela ba pasiente sira ne’ebé sente moras la grave atu halo tratamentu iha Sentru Saúde no Postu Saúde sira besik hodi evita bá hamutuk iha HNVG Dili.

“Husu mós ba pasiente sira ne’ebé kondisaun sente di’ak ba Sentru Saúde sira ne’ebé mak besik labele mai hotu HNGV tanba haree mós kondisaun HNGV nian se moras todan liu mak mai hodi halo tratamentu intensivu,” tenik Aniceto.

Dadaun ne’e, parte HNGV mós prepara  alkohol ba vizitante sira atu fase liman molok vizita pasiente sira hodi prevene an hosi coronavirus.

Jornalista : Felicidade Ximenes

Editór       : Agapito dos Santos

HAKEREK NO HATÁN

Please enter your comment!
Please enter your name here