Primeiru-Ministru, Taur Matan Ruak, prezide Reuniaun Konsellu Ministru iha CCD. Imajen Tatoli/Egas Cristovão

DILI, 30 marsu 2020 (TATOLI) – Estadu Emerjénsia ne’ebé Prezidente Repúblika, Francisco Guterres ‘Lú Olo’ dekreta ona, hahú entra ein vigór iha loron sábadu, 28 marsu, husi oras 00:00 to’o 26 abríl 2020, oras 23:59, tanba ne’e tama iha loron datoluk implementasaun Governu husu komunidade atu kumpre medida 16 ne’ebé Governu estabelese ona.

Timor-Leste hahú tama ona iha Estadu Emerjénsia atu fó dalan ba Governu implementa médida espesífiku sira hodi prevene Coronavírus ka COVID-19.

Sekretáriu Estadu Komunikasaun Sosiál, Merício Juvinal dos Reis ‘Akara’, hateten Governu liuhosi Sekretaria Estadu Komunikasaun Sosiál (SEKOMS) hakarak husu ba populasaun Timor-Leste atu komprende no kumpre medida ezekusaun 16 ne’ebé Governu aplika durante Estadu Emerjénsia nia laran ne’ebé dekreta ona husi Prezidente Repúblika númeru 29/2020, 27 marsu 2020.

Medida hirak ne’e, fó ona autorizasaun ba autoridade seguransa no forsa iha terrenu hodi haree no ezekuta bainhira komunidade la kumpre maka sei hetan sansaun.

“SEKOMS iha responsablidade tomak ajuda ita-nia públiku sira iha territóriu Timór laran tomak atu komprende didi’ak Dekretu Governu nian ba medida kona-ba ezekusaun 16 ne’ebé Governu aplika durante Estadu Emerjénsia nia laran, liga ba sira nia atividade loron-loron”, dehan Sekretáriu Estadu Akara liuhosi konferénsia imprensa ne’ebé maka hala’o iha salaun SEKOMS, Palásiu Governu, segunda ne’e.

Tanba ne’e, liuhosi konferénsia imprensa ne’e maka sei transmite ba públiku kona-ba medida sira ne’e.

“Ha’u simu informasaun husi públiku katak ita-nia komunidade balun seidauk komprende didi’ak pontu importante kona-ba ezekusaun 16 ne’ebé Governu aplika durante Estadu Emerjénsia nia-laran”, nia adianta.

Nune’e, medida ezekusaun ne’ebé Governu aplika durante Estadu Emerjénsia maka:

1.  Bandu ema estranjeiru sira atu labele tama mai iha territóriu Timór.

2. Kontrola efetivu sanitáriu ka saúde, hanesan medida temperatura isin manas kona-ba tama ka sai husi territóriu nasionál Timor-Leste nian, ne’ebé Ministériu Saúde hala’o hela.

3.  Ema ka individu ne’ebé maka tama mai territóriu nasionál Timor-Leste, obrigatóriumente tenke submete ba karantina.

a. Ema sira ne’ebé maka iha sintoma, obrigatóriu sujeitu ba izolamentu terapéutiku.

b. Ema sira ne’ebé laiha sintoma Coronavírus, sei submete de’it ba izolamentu preventiva ba periúdu loron 14.

4. Suspende Transporte Públiku ne’ebé tula ema ka pasajeiru barak liu. Ita-nia Polísia Nasionál Timor-Leste (PNTL) agora halo hela nia servisu hodi implementa pontu ida-ne’e.

5. Bandu atu halo reuniaun ka manifestaun ne’ebé halibur malu, labele liu ema na’in-lima.

“Ita nian PNTL sei ezekuta hela regra ida-ne’e kuandu ita-nia sidadaun sira la kumpre, maka PNTL sei foti medida iha terrenu hodi fó sansaun ba ita-nia komunidade sira ne’ebé la kumpre”, nia realsa.

6. Bandu atu halo atividade eventu sosiál ka kulturál, desportu no atividade seluk ne’ebé halibur liu ema na’in-lima.

7. Bandu atu selebra ka halo atividade ne’ebé ho kariz relijiaun no mós eventu sira seluk ho kultura ne’ebé halibur ema liu na’in-lima.

8. Karik iha funerál ka hakoi ema mate ho nia kodisaun maka, ho distánsia entre ema ba ema seluk mínimu metru ida, se di’ak liu distánsia entre ema ba ema seluk liu metru ida.

9.Membru Governu ne’ebé responsável iha área saúde liuhosi despaisu bele halo rekizasaun ba kualkér bens servisu ba pesoál singular ka koletivu iha direitu públiku ka privadu ne’ebé nesesáriu hodi kombate ba moras Covid-19.

10. Husu komersiante sira atu prepara kondisaun, atu nune’e klinte sira bele fase liman antes tama no sai husi fatin komérsiu ne’e.

11. Ba ema hotu ne’ebé servisu ka ba sosa sasán iha fatin komersiál sira tenke uza máskara no fase liman antes tama no hafoin sai husi fatin ka loja.

12. Ba komunidade ka kompradór sira ne’ebé la kumpre hodi fase liman antes tama no sai husi fatin komersiál ne’e lalika ba kompra iha ne’ebá.

13.Ba vendedór ambulante ka tiga roda sira mós tenke kumpre regra ne’ebé temi ona iha númeru 10,11 no 12 ba medida ezekusaun ida ne’e.

14. Ba Membru Governu sira no órgaun ezekutivu sira, ba pesoál sira ka koletivu públika hanesan adminstrasaun indireita estadu nian, husu atu indentifika rekursu umanu ne’ebé nesesáriu atu asegura funsionamentu ho rejime servisu ne’ebé mínimu ka naton servisu públiku ne’e superiormente presiza.

15. Suspende eskola hotu iha iha territóriu Timor-Leste.

16. Fiskalizasaun ba diploma ida ne’e ka detallu Estadu Emerjénsia ida-ne’e sei halo husi forsa servisu seguransa sira maka hanesan ajente  PNTL, F-FDTL, Protesaun Sivíl, inspetór autoridade seguransa alimetár no ekonomia.

Entertantu, medida ezekusaun Estadu Emerjénsia ne’e dekreta husi Governu 3/2020 28 marsu hodi fasilita públiku bele komprende medida ezekusaun ba deklasaun Estadu Emerjénsia hamutuk 16, ne’ebé publika ona iha Jornál Repúblika.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here