Jornalista TATOLI, Nelson de Sousa, halo entrevista ho Diretora Jerál Protesaun Saude, Odete Viegas. Imajen/Jose da Costa

DILI, 30 marsu 2020 (TATOLI)-Rezultadu enkontru entre Primeiru-Ministru, Taur Matan Ruak ho liña Ministeriál, iha domingo (29/03/2020), estabelese tan Sentru Krize ida hodi apoiu Ministériu Saúde atu atende lalais sidadaun ne’ebé iha sintoma Coronavirus ka COVID-19.

Diretóra Jerál Prestasaun Saúde, Ministériu Saúde, Odete Viegas da Silva, informa sentru saúde ne’e ho ninia papel maka atu tulun ekipa vijilánsia sira hodi jere moras no mós fó atendementu sedu no lalais liu.

Ema ne’ebé mak tama iha kuarentena karik iha sintoma, ami bele atende lalais no servisu iha vijilánsia mós másimu liután,”dehan, Odete Viegas da Silva, ba jornalista sira hafoin halo enkontru ho Primeiru-Ministru iha Sentru Konvensaun Dili (CCD-sigla portugés)domingo (29/03/2020), lokoraik.

Odete haktuir, maske Ministériu Saúde iha rekursu umanu limitadu, maibé sei esforsu atu fó atendementu ho rápidu ba suspeitu COVID-19.

”Ita-nia preokupasaun mak se iha kazu suspeitu ba moras coronavirus ita-nia servisu iha laboratóriu, kuarentena, ita la’o nafatin ho másimu tanba ita-nia papel mak ida ne’e hodi atende ita-nia komunidade sira ne’ebé mak moras karik iha COVID-19,”tenik Odete.

Jornalista : Felicidade Ximenes

Editór       : Agapito dos Santos

HAKEREK NO HATÁN

Please enter your comment!
Please enter your name here