Prezidente Autóridade RAEOA-ZEESM, José Luís Guterres, hamutuk ho Ekipa Prevensaun COVID-19, prepara sentru akoilamentu atubele akomoda komunidade sira ne’ebé mai husi rai-li’ur. Imajen/Mídia Gabinete Prezidente Autoridade

DILI, 30 marsu 2020 (TATOLI) – Atu prevene surtu moras globál COVID-19, Prezidente Autoridade Rejiaun Administrativa Espesiál Oé-cusse Ambeno (RAEOA) no Zona Ekonomia Espesiál Sosiál Merkadu (ZEESM), José Luís Guterres, hamutuk ho ekipa konjunta prevensaun COVID-19 husi rejiaun ne’e, identifika ona fatin ne’ebé sai akollimentu ba Oé-Cusse oan sira ne’ebé oras ne’e hala’o hela sira ninia atividade iha Indonézia, bainhira fila mai rai-enklave.

Autoridade deside ona fatin lima ne’ebé sei sai fatin akollimentu mak Otél Lifau, Rezidénsia Fulolo, Otél Cinco Estrela, Klínika Kurasaun, no Salaun Alfándega Palaban.

Tuir nota ne’ebé Agência Tatoli asesu iha segunda ne’e, fó sai katak inisiativa ne’e nu’udar meiu ida husi Autoridade RAEOA-ZEESM hodi responde ba propagasaun Coronavírus, ne’ebé daudaun ne’e Governu rasik alerta inklui Organizasaun Mundial Saúde (OMS), katak moras ne’e hanesan pandemia ona no presiza iha “Asaun Agresiva” husi entidade hotu.

“Autoridade RAEOA sei responsabiliza ba alojamentu hotu inklui fornese ai-han no pulsa atu sira bele kontaktu ba sira-nia família. Autoridade mós responde ba nesesidade seluk ne’ebé presiza durante períodu akollimentu”, dehan Prezidente Autoridade Jose Luís Guterres, hafoin haree preparasaun Ekipa Konjunta Prevensaun COVID-19 iha loron 27 marsu ne’e.

Iha biban ne’e, Ekipa Konjunta Prevensaun COVID-19 RAEOA prepara mós etapa antesipada ba rekezitu bainhira povu Atoni hakat tama ba Oé-Cusse liuhosi fronteira Sakato no Oé-Silo inklui prosesu evakuasaun husi Oé-Cusse mai Dili bainhira iha pesoál balun maka identifika pozitivu  surtu COVID-19 hodi bele transforma mai Dili ho Aviaun MAF (Mission Aviation Fellowship).

MAF  nu’udar organizasaun Kristaun Internasionál, hodi apoia serbisu umanitáriu ho parseiru sira ne’ebé hela iha área remota ne’ebé susar atu hetan asesu hodi fasilita ho dalan ne’ebé simples, rápidu no seguru liuhosi dalan fornese suporta  aviaun modelu kiik ba área hirak ne’ebé presiza tulun husi MAF.

Oras ne’e, Ekipa Konjunta Prevensaun COVID-19 RAEOA kontinua halo sosializasaun ba povu Oé-Cusse kona-ba influénsia husi surtu Coronavírus, inklui ninia asaun preventiva ne’ebé presiza obedese nu’udar regra ba  sosiedade hotu.

Iha sorin seluk, hodi antesipa kona-ba nesesidade báziku ba povu Oé-Cusse hodi responde  deklarasaun Estadu Emerjénsia durante fulan ida, hahú husi loron 28 marsu to’o 26 abríl 2020.

Nune’e, Prezidente Autoridade José Luís Guterres iha loron 27 marsu, simu mos delegasaun emprezáriu Oé-Cusse oan sira iha edifisiu RAEOA.

Sorumutu ne’e, hodi rona   opiniaun husi emprezáriu Oé-Cusse oan sira kona-ba kapasidade emprezáriu   hodi kuntinua fornese nesesidade bázika ba Oé-Cusse bainhira implementa Estadu Emerjénsia, inklui  medida hirak ne’ebé Autoridade RAEOA sei halo   bainhira povu Oé-Cusse infrenta menus ai-han liuliu fós no nesesidade bázika sira seluk.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here