Imajen Espesiál.

DILI, 30 marsu 2020 (TATOLI)–Governu liuhosi Diresaun Nasionál Servisu Água (DNSA) serbisu hamutuk ho United Nations Children’s Fund (UNICEF) hodi fornese profil (bee fatin) hamutuk 10 ne’ebé monta iha dalan publiku sira ne’ebe ema halo movimentasaun barak.  hanesan maneira ida atu prevene COVID-19.

Diretór Nasionál Servisu Água, Eduardo Dias Ximenes hateten, Diresaun Nasionál Servisu Água monta profil hirak ne’e hanesan maneira prevensaun ba kontra pandemia COVID-10 atu komunidade sira bele uza hodi fase-liman bainhira hala’o hela movimentu sosa ka ema ne’ebé uza transporte.

“Dalan públiku ne’ebé mak ema halo movimentu makaas hanesan sudut kota Dili kuaze monta hotu ona. Fatin sanulu ne’e, ami tau profil sanulu mak hanesan Largo Lecidere, rotunda Lahane nian, Vila Verde, Mandarin, Colmera, supermerkadu Lita Store oin, terminál no seluk ne’ebé mak ema halo movimentu makaas,” dehan Diretór Nasionál Servisu Água, Eduardo Dias Ximenes, ba Ajénsia TATOLI liuhosi entrevista via telephone, ohin.

Diretór ne’e dehan, ekipa DNSA mós kontinua observa fatin ne’ebé mak monta profil nune’e bainhira bee hotu karik sira sei ense kedas ho bee.

“Ami mós iha ekipa balu husi DNSA ne’ebé observa direta ba profil bainhira bee hotu sira ense kedas. Nune’e, ema bele uza hodi fase liman bainhira sosa sasan ruma ka tún husi mikrolete no motoriza bele fase-liman,” Diretór ne’e esplika.

Jornalista : Osória Marques

Editór      : Cancio Ximenes

HAKEREK NO HATÁN

Please enter your comment!
Please enter your name here