Estudante sira jawa,Indonesia wainhira to iha aeroportu Nicolao Lobato ,Dili 29 Marsu 2020.Imajen/Antonio Goncalves

DILI, 30 marsu 2020 (TATOLI)-Relasiona ho prevensaun COVID-19 iha rai-laran, Ajénsia Nasionál Aviasaun Timor-Leste (ANATL), regula ona operasaun voo hosi aviaun haat hodi semo mai Timor-Leste ne’ebé sei akontese kada loron domingu.

Aviaun haat ne’e maka Citilink no Sriwijaya hosi Indonézia, Royal Bhutan hosi Singapura no Air North Austrália.

Prezidente Administrasaun Navegasaun Aériu Timor-Leste (ANATL) Romaldo António. Imajen/Egas Cristovão

Prezidente Konsellu Administrasaun Ajénsia Nasionál Aviasaun Timor-Leste, Empreza Públika (ANATL, EP) Romualdo da Silva, hateten voo kada semana dala ida ne’e hodi fasilita tula Timoroan barak maka agora dadaun sei iha estranjeiru no hakarak fila mai rai-laran.

“Ita hotu hatene ona desizaun sai hosi Prezidente Repúblika no Governu mós fó sai ona oinsá mak bele asegura COVID-19 labele da’et mai Timor, entaun ami ANATL haree ba voo komersiál ne’ebé tama mai Timor atu hapara maibé tanba ho haree ba ita-nia sidadaun barak iha estranjeiru entaun foti desizaun katak voo mantein nafatin,”informa, Romualdo ba TATOLI, iha Aeroportu Comoro, segunda (30/03/2020).

Atu garante funsionamentu servisu iha aeroportu maka ANATL koordena ona servisu ho parte Autoridade Aviasaun Sivíl Timor-Leste (AACTL-sigla portugés) atu atende nafatin operasaun voo aviaun sira mai Timor-Leste.

“Ami komunika ona ba Airlines hotu-hotu, ANATL mós sei hasai karta ida nune’e operasionalmente hala’o domingu de’it,”nia tenik tan.

Mezmu nune’e, ANATL sei autoriza aviaun atu semo iha loron bain-bain bainhira tula ekipamentu médiku  ne’ebé iha relasaun ho prevensaun Coronavirus ka COVID-19.

Hatan ba preokupasaun públiku atu taka totál voo hosi aviaun sira mai Timor-Leste, ANATL ezekuta  sevisu baseia ba órden hosi governu.

Jornalista : Hortencio Sanchez

Editór      : Agapito dos Santos

HAKEREK NO HATÁN

Please enter your comment!
Please enter your name here