Médiku-sira halo hela teste ba timoroan-sira husi estranjeiru bainhira to'o iha Aeroportu Internasionál Prezidente Nicolau Lobato, Dili. Imajen Tatoli/ Hortencio Sanches

DILI, 29 marsu 2020 (TATOLI)–Timoroan hamutuk na’in-92 no estranjeiru ida (1) ohin to’o iha Timor-Leste (TL) ho aviaun Citilink no Sriwijaya hosi Denpasar, Indonézia, tanba tauk COVID-19 ne’ebé agora espalla makaas iha mundu.

Hosi pasajeiru na’in-92 ne’e, feto ualu (8) no mane neen (6) ho Citilink no na’in 78, feto 30 no mane 48 ho Sriwijaya to’o iha Aeroportu Internasionál Prezidente Nicolau Lobato Comoro. Citilink to’o iha tuku 11:58 no Srywijaya tuku 13:09 otl.

Hosi pasajeiru hirak-ne’e, timoroan ne’ebé oras ne’e hala’o estudu iha Indonézia no sidadaun Indonézia mane ne’ebé hala’o servisu iha Timor-Leste hanesan asesór iha Gabinete Primeiru-Ministru maibé daudaun ne’e autoridade saúde sei trava hela iha aeroportu hodi halo identifikasaun tanba sidadadaun refere mai hosi nasaun ne’ebé afetadu COVID-19.

Vise-Ministra Saúde, Elia Amaral hateten sidadaun Indonézia ne’e labele tama kuarentena hamutuk ho timoroan sira tanba sidadaun ne’e mai hosi zona mean ba COVID-19.

“Ita trava lai nia iha ne’e. Lalika fó sai nia lai. Nia atu mai servisu iha Primeiru-Ministru nia fatin fali ka Prezidente Repúblika nia fatin mós ita sei haree didi’ak lai, tanba Indonézia agora liña mean ba COVID-19,” dehan Elia.

Iha fatin hanesan, estudante ne’ebé eskola iha Surabaya, Indonézia, Amelia Marçal Araújo haklaken haree ba COVID-19 iha Indonézia númeru aumenta beibeik, tanba ne’e sira deside fila maibé kontinua eskola online.

“Ami fila tanba ita haree COVID-19 agora iha Indonézia kontinua aumenta. Ami eskola hela maibé liuhosi online de’it,” Amelia tenik.

Entretantu, pasajeiru hirak-ne’e sei ba kumpre kuarentena durante loron 14 nune’e bele halo observasaun ba sira-nia kondisaun.

Jornalista: Hortencio Sanchez

Editór: Agapito dos Santos

HAKEREK NO HATÁN

Please enter your comment!
Please enter your name here