Katuas lia-na’in sira hosi uma-lisan haat (4) hanesan, Luanari, Manutelolau, Wenunuk ho Buimanuk hosi Aldeia Wenunuk, Suku Wenunuk, Postu Administrativu Metinaro, Munisípiu Dili, hala’o serimónia rituál duni sai pandemia Coronavirus ka COVID-19 hksi Timor-Leste. Imajen/Eugénio Pereira

METINARO, 29 marsu 2020 (TATOLI)- Fiar ka la fiar! Ne’e mak sinál ne’ebé hatudu iha manu-aten hosi rituál uma-lisan haat iha Metinaro, katak peste letál Coronavirus ka COVID-19 sei la atake to’o Timor-Lete no la da’et ba Timoroan-sira.

Notísia Relevante : Timoroan Hotu Tenke Hamutuk Prevene COVID-19

Rituál duni Coronavirus ka COVID-19 hosi Timor-Leste. Imajen/Eugénio Pereira

Katuas lia-na’in sira  (kuku) hosi uma-lisan haat (4) hanesan, Luanari, Manutelolau, Wenunuk ho Buimanuk husi Aldeia Wenunuk, Suku Wenunuk, Postu Administrativu Metinaro, Munisípiu Dili, ohin, hala’o rituál lisan nian hodi hamulak no fanu ba rai-lulik ho ninia mahein-sira Timor-Leste nian  atu hamriik “satan” no “duni” sai peste letál Coronavirus ka COVID-19 hosi territóriu  Timor-Leste.

Lia-na’in uma-lisan haat ne’e konsidera peste letál  Coronavirus ka COVID-19 ne’ebé hahú mosu iha sidade Wuhan-Xina, hada’et ba mundu tomak too mai Timor-Leste hanesan horok-aat ida. Tanba ne’e, lulik-sira hotu  hamriik “duni” sai hosi Timor horok-aat ida-ne’e.

Katua lia-nain sira (kuku). Imajen/Eugénio Pereira

Antes ne’e, iha sesta (28/03/2020), lia-na’in sira husi uma lisan halo ona rituál hamulak iha idak-idak knua hodi oho animál-sira hanesan, manu, fahi no haree manu-aten ligadu ho pandemia COVID-19.

Lia-na’in uma-lisan Wenunuk, Adão Soares esplika, serimónia rituál hala’o ho di’ak tebes tanba manu-aten hatudu katak, la iha sinál ruma atu COVID-19 atake Timoroan iha territóriu Timor-Leste.

“Ami ohin hamutuk husu ba rai-lulik, ai-lulik, fatuk-lulik, bee-lulik, tasi-lulik no uma-lulik atu fó mahan matak-malirin ba ami no ita-tomak atu kasu tiha horok-aat  COVID-19 ne’ebé mai hosi Xina atake ba too kuaze mundu-tomak. Liuhusi hamulak ida ne’e, ami husu atu lulik-sira akompaña duni-sai moras ne’ebé halo fahi mate, bibi mate no moras aat sira ne’ebé akontese hanesan pandemia COVID-19,” Adão hateten iha nia-hamulak.

Ho fé lisan-nian, Adão fó sasin hosi manu-aten hatudu katak, COVID-19 sei la akontese, tanba horok-aat  African Swine Fever  (ASF) babeur tiha ona Timoroan nia animal hakiak hanesan fahi kuaze  mate-mohu iha territóriu Timor.

Lia-na’in sira mós konsidera COVID-19 hanesan, peste ka horok-aat. Tanba ne’e, meiu ne’ebé bele halo hodi “satan” mak tenke halo duni ritual sira hodi fanu lulik-sira hadeer hamutuk hodi luta kontra peste letál ne’e.

“Ami tunu bibi ida, fahi ida no manu ida, haree katak, la iha sinál aat-ruma, buat hotu hatudu dalan luan ba ita nia lulik-sira lori moras-aat ne’e hosi Timor-Leste,” nia hateten.

Antes hakat sai hosi Uma Lisan Wenunuk, lia na’in no jerasaun uma-lisan ne’e kontinua hamulak ho hakilar lori ai-fafulu ho meik no kro’at-sira hadulas fatuk no ai-lulik no uma-lisan dala-hitu (7) nu’udar sinál lori sai moras-aat hotu-hotu kasa ka soe iha tasi ibun baliza entre Postu Administrativu Metinaro no Kristu Rei nian.

Iha fatin hanesan, jerasaun uma-lisan Wenunuk, Duarte Amaral, fó sasin katak, nia-parte kontente, tanba serimónia rituál hatudu Timor sei la monu ba pandemia COVID-19 nian no simu matak-malirin ba Timoroan tomak.

“Serimónia ida ne’e ita halo   alende sau batar, bolu udan-been no ita hamutuk satan netik Coronavirus hodi haruka moras ne’e fila tiha, tanba ita fiar ba lulik hotu-hotu hodi satan netik moras  ka horok-aat labele tama mai Timor-Leste,” dehan Duarte.

Halo tiha rituál, katuas lia-na’in sira durante semana ida sei halo avaliasaun hodi haree prosesu, kuandu moras ne’e para ona, lia na’in sira sei hamulak hodi taka serimónia ritual.

Serimónia ne’e partisipa direita hosi povu no lia-na’in sira, uza hena mean hodi kesi iha ulun no hetan apoiu hosi Governu Timor-Leste reprezenta Administradór Postu Metinaro ho xefe suku inklui reprezentante Instituisaun PNTL no F-FDTL.

Jornalista : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here