Otél Ramelau Dili. Imajen/TripAdvisor

DILI, 29 marsu 2020 (TATOLI) – Diretór Rekursu Umanu Otél Ramelau, Fonsiano Pereira hateten oras ne’e daudaun otél ne’e hasoru problema rua maka impase polítika no COVID-19, nune’e halo rendimentu otél ne’e ladún di’ak.

“Ami-nia otél hasoru problema rua, ida maka ita hotu hatene daudaun ita hasoru impase polítika durante tinan-rua ona, ne’ebé ita iha inserteza nia laran. Governu hahú husi 2017 to’o agora halo ami nia rendimentu tun tanba ho situasaun ne’e ema ladún mai no agora mai tan ho situasaun Coronavírus, kuaze nasaun hotu inklui ita kuaze lockdown, ema estrajeiru la mai nune’e tuir ha’u hatene redimentu ami-nia ótel nian ne’e tun ba porsentu 90”, nia dehan ba Agência Tatoli iha Otél Ramelau, domingu ne’e.

Nia kompara, iha 2016 bainhira Timor-Leste seidauk infrenta situasaun impase, rendimentu Otél Ramelau sa’e tanba ema estranjeiru ne’ebé mai barak liu maka Korea no Japaun, nune’e mós parte Governu halo atividade barak.

“Maibé agora hafoin Timor-Leste iha impase polítika ne’e, rendimentu tama komesa menus ona tanba menus atividade Governu nian. Kauza seluk maka moras Coronavírus no agora ita-nia Estadu deklara ona Estadu Emerjénsia durante fulan-ida, limite ema tama iha nasaun. Ami sente difikuldade tebes”, Fonsiano akresenta.

Responsável ne’e realsa, ho situasaun ne’e sei fó impaktu boot ba Timor-Leste tanba kazu hanesan COVID-19, la’ós atu loron rua ka tolu, maibé ne’e presiza lori tempu naruk.

“Ha’u hanoin situsaun rua ne’e fó impaktu ba ita-nia ekonomia, bainhira COVID-19 sei nafatin iha, maka ekonomia sei hasoru problema boot. Nune’e mós kona-ba impase polítika kuandu ita-nia líder sira la fó liman ba malu maka difísil ita atu ultrapasa situasaun no difísil ita rekopera fali”, nia afirma.

Kona-ba saláriu ba sira-nia traballadór iha Otél Ramelau ne’e kontinua normál hanesan saida maka sira hetan hetan bain-bain.

Fonsiano mós informa katak, kona-ba prevensaun COVID-19, Otél Ramelau rasik prepara ona hand sanitizer, nune’e bele prevene moras ne’e.

Kona-ba sanitasaun ijiene, Otél Ramelau rasik garante ba ninia finsionáriu sira no ema sira ne’ebé vizita ótel ne’e.

Iha sorin seluk, Xefe Rejistu Otél Timor Lodge, Olga Viera hateten ótel ne’e ninia rendimentu iha tinan kotuk vizitante barak maibé iha tinan ida ne’e vizitante menus tebes.

“Rendimentu tinan kontuk di’ak tanba iha tinan-tinan kuaze estudante Austrália mai halo estudu komparativu, atu mai iha tinan ida ne’e sira booking hotu no kansela tanba tauk ho Coronavírus”, nia salienta.

Responsável otél ne’e haktuir, rendimentu tinan kotuk di’ak tebes kompara tinan agora ne’ebé daudaun ne’e tun demais tanba kauza moras COVID-19.

“Ema la mai no ita iha Estadu Emerjénsia tan fulan-ida nian no la hatene bainhira mak situasaun ne’e bele la’o ho normál filafali, nune’e rendimentu bele di’ak”, nia akresenta.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here