Pasajeiru timoroan ida ne’ebé Aviaun Druk Air KB 900 tula hosi Singapura mai Dili, ohin. Imajen Tatoli/Cipriano Colo.

DILI, 29 marsu 2020 (TATOLI)—Ohin, Aviaun Royal Bhutan Airlines Singapura ka Druk Air KB 900 hosi Singapura tula de’it timoroan ida hosi Singapura mai Dili, Timor-Leste. Aviaun refere, to’o iha Aeroportu Internasionál Nicolau Lobato, Comoro, Dili, iha tuku 8:20 dadeersan.

Timoroan ho naran Aseu (la’os naran loloos), ne’ebé mai husi Ámsterdam iha semana kotuk no transit iha Singapura inklui Kuarentena durante semana ida, hafoin tuir teste médiku no pasa ho rezultadu normál (negativu) mak ohin loron ne’e liu mai Timor-Leste.

Imajen Tatoli/Cipriano Colo.

“Ha’u Viajen husi Ámsterdam mai Singapura, depois atu liu ba Bali maka ha’u nia billete kanseladu. Nune’e, ha’u iha Singapura loron neen (6) hela iha kuerentena. Depois tuir teste médiku ho rezultadu negativu ka normál. Tanba ne’e mak autoridade aeroportu Singapura nian autoriza ha’u liu mai Dili, ohin. Ha’u sai husi Singapura madrugada. Ha’u haluha oras tuku hira mak ne’e,” haktuir Aseu ba Ajénsia TATOLI liuhosi entrevista iha Aeroportu Internasionál Nicolau Lobato, Comoro, Dili, ohin.

Nia haktuir, horiseik nia sosa tikete nia mós la hatene katak ohin ne’e nia mesak mak mai Timor-Leste.

“Ha’u iha aviaun laran ho pramugari na’in rua no pilotu na’in rua . Ha’u mós hakfodak tanba ha’u mesak mak iha aviaun laran,” nia haktuir.

Aseu ninia orijinál hosi Postu Administrativu Letefoho, Munisípiu Ermera no durante ne’e nia serbisu iha Reinu Unidu dezde tinan 2017 to’o ohin loron.

Entretantu, tuir informasaun ne’ebé Ajensia TATOLI asesu hosi parte imigrasaun iha Aeroportu Internasional Nicolau Lobato, Dili, hateten katak aviaun ne’e alende tula pasajeiru timoroan na’in ida mesak ne’e, aviaun refere tula mós aimoruk mai Timor-Leste.

Oras ne’e daudaun, iha aeroportu, pasajeiru ne’e hein hela ekipa interministeriál prevensaun COVID-19 nian atu tula ba fatin kuarentena.

Aleinde ne’e, informasaun seluk ne’ebé parte imigrasaun fó ba Ajénsia TATOLI katak, Aviaun Dulk Air KB 900 sai fali ba Singapura husi Dili tula pasajeiru estranjeiru na’in 16 kompostu hosi feto na’in ualu (8) no mane na’in ualu (8).

Informasaun hosi aviasaun, ohin, Aviaun Citilink ho Sriwijaya sei tama iha Dili iha tuku 13:00.

Notisia Relevante: Tauk Risku COVID-19, Traballadór Timoroan iha Austrália Deside Fila

Jornalista : Cipriano Colo

Editór      : Cancio Ximenes

HAKEREK NO HATÁN

Please enter your comment!
Please enter your name here