Vise Ministru Saúde ba Dezenvolvimentu Estratéjiku Saúde (VMDES), Bonifácio Maukoli dos Reis, observa direitamente kondisaun kuarentena COVID-19 iha Postu Integradu Batugade. Imajen/Eugénio Pereira

BATUGADE, 29 marsu 2020 (TATOLI)– Preparativus ba fatin Kuarentena Coronavirus ka COVID-19 ne’ebé estabelese iha Postu Integradu Fronteira Terrestre Batugade, Postu Administrativu Balibo, Munisípiu Bobonaro, seidauk utiliza tanba prosesu fíziku instalasaun ba fatin refere foin atinje porsentu 20 (%20).

Notísia Relevante : Estudante 72 Tama Hosi Fronteira Batugade Laiha Sintoma COVID-19

Diretór Kompañia Nasionál Remistader, Tomas Pereira, ne’ebé responsavel ba instalasaun kuarentena ne’e informa, servisu la’o tarde uitoan, tanba loja Xineza-sira ne’ebé fa’an sasán infraestrutura taka hotu bainhira Prezidente Repúblika (PR), Francisco Guterres “Lú Olo” dekreta Estadu Emerjénsia.

“Projetu emerjénsia ne’e ami ezekuta tuir desizaun Ministériu Saúde nian atu harii kuarta provizóriu 300, maibé servisu ita haree foin tama %20, tanba ami hasoru dezafiu mak atu ba kompras sasán infraestrutura loja barak taka, maibé ami garante servisu sei finaliza,” informa Tomas Pereira ba jornalista iha Postu Integradu Batugade, sábadu (28/03/2020).

Diretór ne’e garante prosesu konstrusaun sei finaliza durante semana rua nia-laran hodi entrega ba governu Timor-Leste para bele utiliza ona.

“Ami presiza tan semana rua para finaliza lalais prosesu konstrusaun ne’e,” tenik nia.

Daudaun ne’e, tékniku-sira ne’ebé servisu iha obra refere envolve ema na’in 10-liu kompostu badaen profisionál na’in rua no tékniku seluk-tan.

Iha fatin hanesan, Diretór Sentru Saúde Munisípiu Bobonaro, João Carodo dehan, bainhira konstrusaun kuarentena ba COVID-19 ne’e remata ona, maka ekipa sei monta fasilidade tuir desizaun governu nian hodi simu ona Timoroan sira ne’ebé hala’o viajen liuhosi Fronteira Motain-Indonézia mai hela hotu iha kuarentena ne’e.

Nia hatutan, movimentu estudante Timoroan barak mai hosi Indonézia halo pasa revista tiha ba sira-nia saúde haruka kedas ba ekipa COVID-19 transporta kontinua ba hela iha kuarentena iha Dili.

Antes ne’e, Vice Ministru Saúde ba Dezenvolvimentu Estratéjiku Saúde (VMDES), Bonifácio Maukoli dos Reis, halo ona vizita hodi haree prosesu konstrusaun ba postu kuarentena ne’e.

Jornalista : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here