Karreta ne’ebé uza atu halo diseminasaun informasaun ba komunidade suku sira iha Dili laran. Imajen/Mídia SEKOMS

DILI, 29 marsu 2020 (TATOLI) – Daudaun ne’e, Governu liuhosi Sekretaria Estadu Komunikasaun Sosiál (SEKOMS) hamutuk ho ekipa interministeriál prepara karreta hamutuk lima hodi fasilita tama sai suku iha kapitál Dili hodi divulga informasaun relasiona ho prevensaun COVID-19.

Sekretáriu Estadu Komunikasaun Sosiál, Merício Juvinal dos Reis ‘Akara’, hateten inisiativa ne’e mai husi ekipa liña ministeriál hodi disemina informasaun.

“Ita iha servisu interministeriál ne’ebé halo koordenasaun servisu, husi SEKOMS oferese karreta ida, FALINTIL-Forsa Defeza Timor-Leste (F-FDTL) mós oferese karreta ida, parseiru hanesan Crús Vermelha de Timor-Leste (CVTL)  sira mós kotribui karreta ida, inklui Ministériu Saude (MS) no Komisaun Direitu ba Labarik kontribui kada instituisaun ida. Ne’ebé daudaun ita iha karreta lima no ida ne’e sei uza hodi funsiona tama sai suku hodi kontinua nafatin fó aviza ba komunidade iha suku relasiona COVID-19”, dehan Sekretáriu Estadu Akara hafoin ramata enkontru liña ministeriál iha  Sentru Konvensaun Dili (CCD, sigla portugés).

Maski nune’e, governante ne’e adiante katak nia parte sei esforsu hodi hato’o tan proposta ba Komisaun Jestaun Krize ne’ebé forma ona husi Governu rasik no lideradu direita husi Primeiru-Ministru Taur Matan Ruak.

“Nune’e bele apoia tan veíkulu balun atu fasilita divulga informasaunn to’o iha suku iha Dili-laran, nune’e komunidade sira bele akompaña informasaun kona-ba COBID-19 no labele pániku.

Nia salienta, sei hato’o tan proposta hodi bele aumenta tan fasilidade lojístika, nune’e bele fasilita tama no sai suku hodi aviza ba komunidade relasiona Coronavírus

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here