Primeiru-Ministru, Taur Matan Ruak prezide reuniaun Gabinete Jestaun Krize no Komisaun Interministeriál kona-ba luta kontra COVID-19 iha CCD, domingu (29/03). Imajen Tatoli/Egas Cristovão

DILI, 29 marsu 2020 (TATOLI) – Governu deside ona estabelese Gabinete Jestaun Krize hodi luta kontra pandemia globál COVID-19.

Gabinete ne’e kria hafoin Prezidente Repúblika (PR), Francisco Guterres ‘Lu Ólo’ Dekreta Estadu Emerjénsia no gabinete ne’e lidera diretamente hosi Primeiru-Minsitru (PM), Taur Matan Ruak.

Notísia Relevante: PR Lú-Olo Dekreta Ona Estadu Emerjénsia Hodi Prevene COVID-19

Governu Hahú Estabelese Komisaun Jestaun Krize Hodi Jere Estadu Emerjénsia

Hafoin estabelese Gabinete Jestaun Krize, iha domingu ne’e hahú reuniaun koordenasaun servisu hamutuk ho Konsellu Interministeriál ne’ebé lidera hosi Ministériu Saúde (MS).

Ministru Reforma Lejizlativa Asuntu Parlamentár, Fidelis Manuel Leite Magalhães, informa reuniaun ne’ebé realiza hanesan reuniaun dahuluk ba Gabinete Jestaun Krize no Konsellu Interministeriál.

Governante ne’e afirma, gabinete ne’e sei tau-matan ba esforsu Estadu nian tomak liuliu Governu, iha situasaun Estadu Emerjénsia.

“Enkontru ne’e diskute ajenda rua, dahuluk rona aprezentasaun hosi Gabinete Sentru Jestaun Krize ne’ebé maka halo aprezentasaun kona-ba organizasaun métodu funsionamentu gabinete ne’e rasik”, dehan Ministru Fidelis hafoin reuniaun dahuluk Gabinete Jestaun Krize no Konsellu Interministeriál ne’ebé hala’o iha Sentru Konvensaun Dili (CCD, sigla portugés), domingu ne’e.

Tuir governante ne’e, Gabinete apoiu ne’e ninia knaar xavemak sei ajuda hodi apoia direta ba Primeiru-Minsitru ne’ebé sei lidera ho esforsu tomak hodi luta kontra COVID-19 durante Estadu Emerjénsia.

Ministru Koordenadór Asuntu Ekonómiku interinu ne’e realsa, ajenda daruak maka aprezentasaun hosi MS ne’ebé aprezenta hosi Diretora Jerál Prestasaun Saúde, Odete Viegas ne’ebé durante ne’e esforsu hosi parte saúde nian ba luta kontra COVID-19.

“Ministériu Saúde liuhosi Diretora Odete Viegas halo aprezentasaun ne’ebé kle’an kona-ba esforsu no membru konsellu interministeriál ne’e rona no hatene didi’ak ita (Governu) nia preparasaun to’o iha ne’ebé? no sei presiza halo preparasaun di’ak liután ba-oin”, subliña Fidelis.

Portavóz VIII Governu ne’e relata, asuntu rua ne’e iha komplementaridade katak Gabinete Jestaun Krize ne’e sei halo esforsu hotu ne’ebé maka saúde halo to’o agora no sei di’ak liután, tanba ho estrutura jestaun krize nian maka sei ajuda saúde atu foku liután ba esforsu parte saúde nian atubele liberta preokupasaun sira seluk hanesan fatin ba kuarentena, lojístika, no seluk tan.

“Buat sira ne’e hotu ministériu idaidak bele book-an liután, invez de’it saúde maka preokupa hotu maibé ministériu idaidak bele organizadu liu no bele book-an ho lalais ho koordenasaun interdepartementál ne’ebé maka Gabinete Jestaun Krize ne’e halo”, nia akresenta.

Ministru Fidelis salienta, aprezentasaun dahuluk ne’e hosi Diretór Institutu Defeza Nasionál (IDN), Capitão Már e Guerra, Donaciano Costa Gomes, ne’ebé aprezenta kona-ba métodu ne’ebé sira hatuur iha sistema, iha Dekretu-Lei ida.

“Hatuur  ona katak bainhira ita tama krize karik ita presiza instituisaun atu ajuda ita atubele ultrapasa krize ne’e no bele koordena esforsu hotu durante krize”, nia dehan tan.

Entretantu, sorumutu ne’e lidera hosi Xefe Governu no partisipa hosi membru Governu kompetente sira, Xefe Estadu Maiór FALINITL-Forsa Defeza Timor-Leste (F-FDTL), Majór Jenerál Lere Anan Timur, Komandu Jerál Polísia Nasionál Timor-Leste (PNTL), Komisáriu Faustino da Costa, Diretór IDN, Capitão Már e Guerra, Donaciano Costa Gomes, no ekipa hosi Gabinete Jestaun Krize inklui Konsellu Interministeriál.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here