Ekipa Mediku ne'ebé destaka iha Postu Integradu Fronteira Batugade halo teste uza Infrared Thermometer hodi idenitifka sintoma COVID-19. Imajen/Eugénio Pereira

DILI, 29 marsu 2020 (TATOLI)- Estudante Timoroan na’in 72 iha Indonézia ne’ebé tama-mai Timor-Leste liuhosi postu fronteira Batugade, sábadu (28/032020), laiha sintoma Coronavirus ka COVID-19.

Notísia Relevante : MS Hahú Instala Kuartu 300 iha Kuarentena Batugade

Estudante Timoroan hirak-ne’e, balun eskola iha universidade-sira iha Bandung, Malang, Surabaya, Jakarta no Kupang, deside husik hela sira-nia estudu fila-mai sira-nia knua Timor-Leste tanba ta’uk ho pandemia COVID-19 ne’ebé loron ba loron afeta maka’as iha territóriu Indonézia.

Bainhira estudante-sira ne’e haku’ur-liu postu fronteira Batugade, Postu Administrativu Balibo, Munisípiu Bobonaro, submete uluk ba teste saúde hosi ekipa médiku ne’ebé destaka iha Postu Integradu Batugade, la identifika sira sintoma COVID-19. Maske nune’e, sira-hotu iha obrigasaun hodi submete ba prosesu kuarentena loron 14 nia-laran iha Dili molok sira fila ba sira ida-idak nia-família.

Diretór Sentru Saúde Munisípiu Bobonaro, João Cardoso dehan, estudante sira-ne’e tama mai, ekipa Médiku uza Infrared Thermometer hodi teste sira-nia kondisaun fíziku no saúde, hatudu katak, sira-hotu la identifika sofre moras ruma ka COVID-10.

“Ita nia estudante ne’ebé viajen hosi Indonézia mai hamutuk ema na’in 72, ami uza Infrared Thermometer teste sira hotu ho kondisaun saúde no fízika di’ak, entaun ami koopera ho Unidade Polísia Fronteira (UPF) transporte kedas sira ba iha fatin kuarentena ne’ebé ita-nia governu prepara iha Dili,” informa Diretór João  Cardoso, ba jornalista iha Batugade, sábadu (28/03/2020).

Estudante na’in 72, ekipa médiku koloka na’in neen (6) ba hela iha kuarentena Tibar no na’in 32 ba hela iha Otél Faról no Otél Vila-Verde.

João Cardoso hateten, bainhira konstrusaun kuarentena Batugade finaliza ona, maka Timoroan ne’ebé fila hosi Indonézia liuhosi Batugade sei hela hotu iha fatin kuarentena Batugade nian durante loron 14 nia-laran.

Jornalista : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here