Sesaun Plenária Parlamentu Nasionál. Imajen Tatoli/António Gonçalves

DILI, 29 marsu 2020 (TATOLI) – Atu antesipa COVID-19 no haree ba nesesidade, Ministra Finansa ein ezersísiu, Sara Lobo Brites no Governadór Banku Sentrál Timor-Leste (BCTL-sigla portugés), Abraão Vasconselos, husu tan orsamentu adisionál millaun $100 no dadaun ne’e Komisaun C ne’ebé trata asuntu Finansa Públika halo ona paraser ho razaun fundamentu bazeia ba rekomendasaun Governu.

Ba kestaun ne’e, Vise-Prezidente Parlamentu Nasionál, Maria Angelina Sarmento, konsidera deputadu sira presiza iha konsiénsia hodi aprova orsamentu adisionál, tanba ne’e kona-ba nesesidade povu nia.

“Sei la fásil atu transporta osan mai Timor-Leste tuir períodu normál nian. Hafoin faze tuir mai, papél deputadu sira-nia maka atu apresia no aprova pedidu refere iha plenária. Agora atu aprova ka la aprova, depende ba deputadu sira-nia konsiénsia atu loke fuan hodi haree nesesidade urjénsia sira-nee, ne’ebé obriga Estadu tenke foti medida atu oinsá serví nia povo iha situasaun emerjénsia hanesan agora”, tenik Deputada Bankada Partidu Libertasaun Popular (PLP) ne’e ba Agência Tatoli via rede sosiál, domingu ne’e.

Membru Komisaun C ne’e esplika, osan millaun $100 ne’e nu’udar rezerva ba Timor-Leste bainhira hasoru situasasaun defísil liga ho COVID-19.

“Kuandu Timor-Leste presiza urjente, ita la presiza rekere ona ba banku iha Amérika, maibé iha osan rezerva ona no la difikulta ona prosesu”, nia akresenta.

Vise-Prezidente ne’e realsa, proposta adisionál hosi Governu ne’e nesesáriu atu halo reforsu ba kofre Estadu

“Prinsipalmente ho situasaun urjente hanesan agora, liuliu tanba mundu hotu ameasa ho vírus ne’e no halo lockdown iha fatin hotu liuliu iha Estadu Unida Amérika (EUA)”, nia salienta.

Deputada Angelina realsa, pedidu atuhalo levantamentu fundu petrolíferu ba Parlamentu Nasionál ho karáter urjénsia, ho totál millaun $250 ne’e, nia objetivu mak atu halo reforsu ba kofre Estadu ba fulan-abríl ba-oin hodi finánsia mákina Estadu liuhosi orsamentu duodésimu, tanba Timor-Leste seidauk iha Orsamentu Jerál Estadu (OJE).

“Orsamentu millaun $250 ne’e seidauk prevee nesesidade sira hanesan kombate no prevene COVID- 19, inundasaun no Estadu Emerjénsia, tanba montante ne’e Governu sei gasta iha fulan hirak tuir-mai ne’e, sei bazeia de’it ba rejime duodesimál artigu 31 hosi Lei Orsamentu no Jestaun Finanseira (LOGF, sigla portugés).

Nia adianta, kuandu OJE seidauk iha, uza osan duodésimu bazeia ba montante hosi orsamentu tinan anteriór nian mak fahe ba fulan 12.

Deputada Bankada Governu ne’e refere liután katak, pedidu levantamentu no proposta adisionál ne’e sei debate iha faze jeneralidade no espesialidade, no sei halo loron ida de’it, iha segunda lokraik.

Nune’e mós, sei aplika loron ida de’it hodi halo debate no aprovasaun final globál.

Jornalista: Evaristo Soares Martin

Editór: Cancio Ximenes

HAKEREK NO HATÁN

Please enter your comment!
Please enter your name here