Timoroan sira ne'ebé servisu iha Australia, to'o hikas iha Aeroportu Internasionál Prezidente Nicolau Lobato, Dili, 28 marsu 2020. Imajen Tatoli/ Hortencio Sanches

DILI, 28 marsu 2020 (TATOLI)–Sábadu ne’e, timoroan ne’ebé durante ne’e hala’o servisu iha Austrália hamutuk nai’n-59 deside filahikas mai Timor-Leste ho aviaun Air North maizumenus tuku 8:45 otl nune’e bele hadok-an hosi COVID-19 ne’ebé komesa sa’e ba daudaun. Hosi totál timoroan ne’e, feto 38 no mane 21.

Traballadór timoroan, Agapito Lopez Maia, hateten loloos sira-nia kontratu seidauk ramata maibé tanba tauk COVID-19 sira tenke deside fila.

“Loloos ne’e ami-nia kontratu seidauk ramata. Ami-nia kontratu hotu iha maiu maibé iha sidade Melbourne ne’ebé ami hela ne’e númeru COVID-19 sa’e makaas entaun ami deside husu lisensa ba Governu no toos-na’in sira atu fila. Se situasaun normál uitoan, ami bele filafali bá,” dehan traballadór ne’e ba Agência Tatoli iha Aeroportu Internasionál Prezidente Nicolau Lobato, Comoro, Dili.

Nia haklaken, toos-na’in iha Austrália koopera di’ak tebes ho sira no lakohi traballadór hirak-ne’e kona moras nune’e fó livre ba sira atu filahikas mai Timor-Leste hafoin bele filafali.

Entretantu, traballadór hirak-ne’e maioria servisu iha área ospitalidade no hortikultura. Timoroan ne’ebé daudaun ne’e servisu iha Melbourne hamutuk 86.

Jornalista: Hortencio Sanchez

Editór: Agapito dos Santos

HAKEREK NO HATÁN

Please enter your comment!
Please enter your name here