Primeiru-Ministru, Taur Matan Ruak konvoka enkontru ho Ekipa CAAEPC iha Palásiu Governu, sesta (27/03). Imajen/Mídia-GPM

DILI, 28 marsu  2020 (TATOLI) – Primeiru- Ministru (PM), Taur Matan Ruak, iha sesta ne’e, konvoka tan enkontru ho ekipa Komisaun Akompañamentu Avaliasaun ba Estratéjia Prevensaun no Kombate Surtu Coronavírus Deases ka COVID-19 (CAAEPC-COVID-19, sigla portugés), hodi haree hamutuk relatóriu preliminár kona-ba COVID-19 nian.
Ekipa ne’e entrega ona ba Xefe Governu, nune’e mós haree preparasaun sira ba oin, liuliu iha períodu Estadu Emerjénsia.

“Iha enkontru badak ho Primeiru-Ministru atu haree relatóriu preliminar, ne’ebé ami entrega tiha ona. Hafoin atu haree didi’ak fali preparasaun ita-nian atu hasoru Coronavírus ne’e, liuliu tanba ita tama ona ba períodu Estadu Emerjénsia iha sábadu (28/03), ne’ebé atu haree took saida mak ita tenke halo no saida mak labele halo”, esplika Doutór Sérgio Lobo liuhosi nota ne’ebé Agência Tatoli asesu liuhosi Pájina Gabinete Primeiru-Ministru (GPM), sábadu ne’e.

Tuir eis Ministru Saúde ne’e, Timor-Leste presiza hatene katak atu prevene Coronavírus ne’e ninia objektivu iha rua mak hanesan, atu moras ne’e labele tama iha rai Timór no bainhira tama mós labele da’et ba ema barak.

“Ita ne’ebé mak halo tratamentu ba ema moras ne’e, ita evita ema mate tanba moras ne’e. No importante liu maka atu evita impaktu sosiál no impaktu ekonómiku, ne’e mak ami ko’alia”, nia akresenta.

Nia adianta, daudaun ne’e númeru pesoál saúde limitadu atu halo atendementu, tanba ne’e Governu liuliu Ministériu Saúde presiza treina tan profisionál saúde sira halo barak liután, atubele preparadu luta kontra COVID-19.

CAAEPC-COVID-19 estabelese liuhosi Diploma Ministeriál 001/PM/III/2020/ 20 Marsu 2020, kompostu hosi profisionál saúde esperiente sira,  no reprezentante Organizasaun Mundiál Saúde (OMS) iha iha Timor Leste, ho objetivu atu ajuda Xefe Governu foti desizaun ba luta kontra COVID-19.

Ekipa ne’e kompostu hosi Antigu Ministru Saúde iha V Governu Konstitusionál, Doutór Sérgio Lobo, Antigu Ministru Saúde iha IV Governu Konstitusionál, Doutór Nelson Martins, Antigu Vise-Ministra Saúde iha VI Governu Konstitusionál, Duotora Ana Isabel de Fátima Sousa, no Reprezentante OMS iha Timor-Leste, Doutor Rajesh Pandav, Antiga Ministra Saúde Cabo-Verde, Doutora Cristina Lima, ne’ebé daudaun hanesan Asesora iha Ministériu Reforma Lejizlativa no Asuntu Parlamentar inklui Espesialista timor-oan ba Moras Infektu-Kontajioza, Doutora Danina Coelho husi Klínika Internasionál Stanford.

Jornalista: Florencio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here