Primeiru-Ministru, Taur Matan Ruak. Imajen Tatoli/ Egas Cristovão

DILI, 28 marsu 2020 (TATOLI) – Iha enkontru Konsellu Ministru Estraordinária, Primeiru-Ministru, Taur Matan Ruak, aprezenta mós despaisu ida kona-ba alterasaun daruak ba despaisu númeru 005/II/2020, loron 18 fevereiru, ne’ebé maka atu komisaun interministeriál, hodi halo koordenasaun ba implementasaun medida prevensaun no kontrolu husi surtu Coronavírus ka COVID-19.

Nune’e, Konsellu Ministru aprova alterasaun ne’e no komisaun inteministeriál lidera husi PM Taur rasik, ne’ebé antes ne’e lidera hosi Ministra Saúde Interina, Élia António de Araujo dos Reis Amaral.

“Ekipa liña ministériál ne’e lidera ona husi Primeiru-Ministru, la’ós ona Ministra Saúde Interina. Primeiru-Ministru rasik mak halo koordenasaun ba implementasaun medida prevensaun no kontrolu husi surtu Coronavírus,” tenik Ministru Defeza no Seguransa, Filomeno Paixão hafoin enkontru Konsellu Ministru iha Sentru Konvesaun Dili (CCD, sigla Portugés), sábadu ne’e.

Komisaun Interministeriál ne’e kompostu hosi Primeiru-Ministru rasik, Ministra Saude Interina; Élia António de Araújo dos Reis Amaral, Ministru Koordenador Asuntu Ekonómiku interinu, Fidelis Manuel Leite Magalhães, Ministra Finansa Interina, Sara Lobo Brites, Ministru Negósiu Estranjeiru no Kooperasaun, Dionísio da Costa Babo Soares, Ministru Administrasaun Estatál Interinu, Abílio José Caetano.

Nune’e mós, Ministru Transporte no Komunikasaun, José Agustinho da Silva, Ministru Defeza no Ministru Interior Interinu, Filomeno da Paixão de Jesus, no Ministru Justisa, Manuel Cárceres da Costa

Inklui mós, Ministra Solidariedade Sosiál no Inkluzaun, Armanda Berta dos Santos, Ministra Edukasaun Juventude no Desportu, Dulce de Jesus Soares, Ministru Ensinu Superior no Siénsia Kultura, Longuinhos dos Santos, Ministru Agrikultura no Peska, Joaquim José Gusmão dos Reis Martins, Sekretáriu Estadu ba Komunikasaun Sosiál, Merício Juvinal dos Reis ‘Akara’, Sekretáriu Estadu ba Protesaun Sivíl, Alexandrino de Araújo, Xefe Estadu Maior Jenerál Forsa Armada, Major Jenerál Lere Anan Timur, Komandante Jeral Polísia Nasionál Timor-Leste, Faustino da Costa no Diretór Sentru Integradu ba Jestaun Krize, Brigadeiru Jenerál João Miranda ‘Aluk’.

Tuir ajenda domingu ne’e, iha tuku 15:00 lorokraik, Xefe Governu sei prezide reuniaun interministeriál kona-ba prevensaun COVID-19 iha CCD.

Jornalista: Florencio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here