Ministra Finansa ein ezersísiu, Sara Lobo Brites. Imajen/Egas Cristovão

DILI, 28 marsu 2020 (TATOLI)—Ministériu Finansa (MF) interina propoin proposta adisionál millaun $100 ba Parlamentu Nasionál hodi antesipa despeza sira ba COVID-19, karik COVID-19 ne’e afeta ema maka’as entaun presiza mós intervensaun ekonomia.

“Pedidu levantamentu ne’e hamutuk millaun $250 maibé momentu ne’ebá ha’u mós husu halo montante adisionál millaun $100 hodi antesipa kedas despeza sira ba COVID-19, karik COVID-19 ne’e afeta ema maka’as entaun presiza mós intervensaun ekonomia. Ha’u husu tán millaun $100 ba Parlamentu Nasionál, horisehik,” Ministra Finansa ein-ezersísiu, Sara Lobo Brites, informa ba jornalista sira, iha Sentru Konvensaun Dili (CCD-sigla portugés), sábadu ne’e.

Pedidu adisionál ne’e Ministra Finansa ne’e husu ona Komisaun C (Finansa Públika) no Komisaun C husu aprezenta ho detalla katak millaun $100 atu uza ba saida de’it.

Tuir planu Komisaun C sei aprezenta relatóriu no pareser ba pedidu levantamentu ba plenária iha segunda-feira ho montante millaun $250 no mós orsamentu adisionál millaun $100 hamutuk millaun $350.

Entretantu, ohin, Ministra Finansa ein-ezersísiu aprezenta mós detalla hosi montante orsamentu adisionál ne’e no Konsellu-Ministru haruka kedas ba Komisaun C iha Parlamentu Nasionál.

Ministra Finansa ein-ezersísiu ne’e dehan, mekanizmu hosi adisionál ne’e Parlamentu Nasionál mak sei deside.

“Ne’e pakote ho pedidu levantamentu maibé nia destinadu ba atu aumenta ba iha rezerva kontinjénsia, karik inisiativa seluk ne’e depende ba Parlamentu Nasionál. Ne’e espesífiku de’it ba COVID-19 inklui dezastre naturál. Kona-ba prosesu implementasaun sei hein Komisaun C nia proposta ba plenária, semana oin ita akompaña,” Ministra Finansa ein-ezersísiu ne’e esplika.

Nia fó-sai katak, orsamentu adisionál millaun $100 ne’e mós sei apoia ba setór privadu sira maibé depende ba desizaun Parlamentu Nasionál.

“Tanba ita agora iha inserteza boot hela. Ministériu Saúde dehan COVID-19 ne’e afetadu maibé  graças a adeus to’o agora ita seidauk afeta entaun ita tenke halo intervensaun ba setór privadu sira nune’e setór privadu sira kontinua selu sira-nia funsionáriu tanba agora dekreta Estadu Emerjénsia,” nia dehan.

Nia subliña, regra ba setór privadu atu dehan osan ne’e sei hein desizaun Parlamentu Nasionál katak aprova ka lae tanba laiha osan Governu labele halo apoia setór privadu.

Bainhira Parlamentu Nasionál aprova ona Governu no Banku Sentrál Timor-Leste sei haree ninia prosesu implementasaun.

Jornalista : Evaristo Soares Martins

Editór      : Cancio Ximenes

HAKEREK NO HATÁN

Please enter your comment!
Please enter your name here