Ministra Finansa ein ezersísiu, Sara Lobo Brites. Imajen Tatoli/Egas Cristovão

DILI, 28 marsu 2020 (TATOLI)—Maske Timor-Leste nia investimentu monu maka’as ho montante Biliaun $1.8 maibé Ministra Finansa Ein-Ezersísiu fó-sai katak Governu sei mantein iha investimentu asaun tanba situasaun ne’e afeta nasaun hotu-hotu.

Ministra Finansa Ein-Ezersísiu atuál Vise-Ministra Finansa, Sara Lobo Brites, rekoñese Timor-Leste nia karteira investimentu liuliu iha asaun (saham) hanesan Bonds no Equity ne’e monu tanba merkadu finanseira internasionál afetadu ho situasaun COVID-19.

Governante ne’e hateten, ema hotu-hotu akompaña presu minarai mós monu ne’ebé afeta tebes ba Timor-Leste nia reseita ba fundu minarai.

Vise-Ministra Finansa ne’e argumenta, karteira investimentu ne’e Timor-Leste halo investimentu ba tempu naruk entaun impaktu negativu sira-ne’e lalika hanoin atu muda fali karteira investimentu.

“Ita mantein hanesan ne’e tanba ita investe iha merkadu asaun ninia volatilidade ne’e aas katak loron ida tún no semana ida sa’e fila-fali maibé kuandu situasaun ne’e normál nia rekupera fila-fali . Ida ne’e la signifika ita muda ninia karteira investimentu,” dehan Sara Lobo Brites, ba jornalista sira iha Sentru Konvensaun Dili (CCD-sigla portugés), sábadu ne’e.

Ministra Finansa Ein-Ezersísiu ne’e esplika, invstimentu asoens iha Bonds no Equity ne’e monu ne’e afeta merkadu hotu-hotu la’ós Timor-Leste de’it.

Ministra Finansa Ein-Ezersísiu responde asuntu ne’e hodi fó resposta ba Governadór Banku Sentrál Timor-Leste (BCTL-sigla portugés), Abrão de Vasconcelos, hateten valór fundu minarai lakon kuaze biliaun $1.8 tanba kauza hosi merkadu finanseira internasionál.

Notísia Relevante: Fundu Minarai Lakon Biliaun $1.8

Jornalista : Evaristo Soares Martins

Editór      : Cancio Ximenes

HAKEREK NO HATÁN

Please enter your comment!
Please enter your name here