Jornalista TATOLI, Nelson de Sousa, halo entrevista ho Diretora Jerál Protesaun Saude, Odete Viegas. Imajen/Jose da Costa

DILI, 28 marsu 2020 (TATOLI)-Sosiedade, liuliu família abitante-sira ne’ebé submete ba iha kuarentena ne’ebé Komisaun Interministeriál prevensaun pandemia COVID-19 prepara, preokupa kondisoens no fasilidade iha kuarentena-laran.

Notísia Relevante : MF Propoin Proposta Adisionál Millaun $100 Ba COVID-19

Menus  bee-moos, kolxaun no xumasu kulapur, fornesimentu hahán tarde no hahán la ijiene. Sai hanesan preokupasaun ne’ebé konsidera bele lori moras ba abitante-sira durante kuarentena. Maibé espetativa  sira-ne’e sai duni atensaun komisaun prevensaun COVID-19 hodi rezolve imediatamente.

Otél Novo Horizonte, Dili. Imajen/Cipriano Colo.

Tuir pesoál kuarentena iha Otél Novo Horizonte, Metiaut, Dili,    Luis Tavares, fó sasin katak, abitante-sira ne’ebé kuarentena iha Novo Horizonte hetan fasilidade di’ak, inklui asegura social distancing, tanba ne’e kada kuartu tau de’it ema na’in rua.

“Iha situasaun balun, ami protestu hanesan akontese iha sesta kalan (27/03/2020), hahán ne’ebé fornese hosi kompañia fornesedór ladún ijiene. Ministériu Saúde responde ho pozitivu no lalais tebes  hodi haruka lori-fila hahán ne’e no fornese fali hahán ijiene ba abitante-sira. maibé tanba kalan boot ona, abitante balun la-han toba tiha de’it,” informa Luis Tavares ba Ajénsia Tatoli, ohin, iha Kuarentena Novo Horizonte.

Nia dehan, loron hirak liu-ba mós maluk balun halo mós protestu kona-ba menu hahán no hahán matabixu, meudia, kalan mai tarde. Nune’e, Ministériu Saúde responde kedas hodi hadi’a situasaun-sira ne’e.

“Ami mai iha kuarentena hahú domingu  (22/03/2020). Fofoun Ministériu Saúde mak fornese hahán to’o loron tolu hanesan ne’e la’o di’ak loos, hosi ne’e ba-oin fali kompañia mak fornese fali. Mezmu loron dahuluk ladún di’ak, mas loron tuir mai MS bolu atensaun ba sira hodi hadi’a ona,” Luis Tavares hateten.

Horizonte Arif, nu’udar abitante ne’ebé kuarentena iha Novo Horizonte, kateten, mezmu ladún preparadu di’ak hosi parte-sira tanba ho situasaun emerjénsia, maibé iha duni progresu atendimentu di’ak no hein katak ba oin parte governu sei hadi’a liu-tan.

Hosi sorin-seluk, Diretora Jerál Prestasaun Saúde, Odete Viegas da Silva husu deskulpa ba maluk abitante iha kuarentena Novo Horizonte ne’ebé pasiénsia hodi kolabora ho parte governu buka posibilidade hotu atu rezolve situasaun sira-ne’e.

“Prontu ho preokupasaun ita nia sidadaun sira-nian iha kuarentena Novo Horizonte, horikalan, ha’u intervein hodi hapara kompañia ida ne’ebé antes ne’e fornese hahán ba iha ne’ebá no troka kompañia foun kedas nune’e nia tenke asegura hahán tuir oras ne’ebé iha,” hateten Diretora Odete Viegas da Silva.

Nia esplika, kona-ba menu hahán sei determina tuir diresaun jerál nutrisaun nian ne’ebé kompañia fornesedór  tenke asegura tuir padraun ne’ebé iha.

Jornalista : Nelson de Sousa

Editór       : Francisco Simões

HAKEREK NO HATÁN

Please enter your comment!
Please enter your name here