Komandante PNTL Munisípiu Dili, Superintendente Xefe Armando Monteiro. Imajen Tatoli/ Maria Auxiliadora.

DÍLI, 28 marsu 2020 (TATOLI)–Komandante Polísia Nacional Timor-Leste (PNTL) Munisípiu Dili, Superintendente Xefe Armando Monteiro, tun direta hodi esplika regra kuarentena ba traballadór no pasajeiru hamutuk 59 ne’ebê foin fila husi Austrália.

Komandante Munisípiu Dili ne’e haktuir protokolu Organizasaun Mundiál Saúde (OMS) atu ema hotu ne’ebé fila husi nasaun afetada hotu-hotu tenke tama kuarentena ho objetivu atu prevene risku ba an rasik, ba família no sosiedade tomak.

“Tanba ne’e ekipa interministeriál, ohin, mai hamutuk hodi simu alin sira bá fatin ne’ebé mak Governu prepara ona mak iha fatin rua mak D’City Hotel iha Vila Verde no Novo Horizonte iha Metiaut,” Komandante Polísia Nacional Timor-Leste (PNTL) Munisípiu Dili, Superintendente Xefe Armando Monteiro, afirma iha Aeroportu Internasionál Nicolau Lobato, Dili, ohin.

Hosi ema-nain 59 ne’e, nia infroma, ema-na’in 40 sei hela iha D’City Hotel no ema na’in 19 seluk ne’e sei hela Hotel Novo Horizonte.

Nia salienta, durante iha kuarentena iha limitasaun no kumpri regra protokulu OMS nian mak uza máskara, labele halibur malu, ida-ida halo auto kuarentena iha kuartu no labele vizita kuartu ida ba kuartu ida seluk.

“Labele kontaktu direta ho família. Bele komunika liuhusi telefone hodi informa ita-nia situasaun durante semana rua nia laran. Labele simu sasán husi li’ur no sasán husi laran imi transfere ba imi-nia família,” nia hateten.

Armando Monteiro esplika, sobre direitu sira ne’ebé timoroan sira ne’e iha durante iha sentru kuarentena mak Governu prepara kondisaun ka alojamentu, han, ekipa saúde preparadu hodi observa estadu ida-idak nian.

“Se ita sente saúde ladún estavel, ita-nia médiku na’in-tolu iha fatin ne’e halo konsulta. Labele fuma. Ha’u haree, ohin, balun lori alkóliku. Durante iha kuarentena, labele konsome,” nia dehan.

Armando Monteiro husu mós ba timoroan sira ne’e bainhira tenta atu halai husi fatin kuarentena maka komunidade ohin loron alerta.

“Labele viola orientasaun Organizasaun Mundiál Saúde. Ita-nia komunidade ohin loron alerta bainhira ó foin tama uma mak komunidade hatene ó foin fila husi estranjeiru, risku ba imi-nia família no mós ba imi. Atu evita ida ne’e, ita agradese ba fatin ne’ebé mak Governu prepara tiha ona,” nia salienta.

Nia hatutan, dalaruma iha difikuldade maibé husu ba timoroan sira atu sukat ezijénsia tuir kbiit nasaun nian ne’ebé ohin loron Timor-Leste enfrenta.

Notísia Relevante: Tauk Risku COVID-19, Traballadór Timoroan iha Austrália Deside Fila

Jornalista : Maria Auxiliadora

Editór       : Cancio Ximenes

1 KOMENTÁRIU

HAKEREK NO HATÁN

Please enter your comment!
Please enter your name here